Carchar i ddyn a ymosododd ar ei bartner a cheisio rhoi ei fflat hi ar dân
Cynnwys y prif erthygl
CAM-DRIN DOMESTIG | Mae dyn a ymosododd ar ei bartner a cheisio rhoi ei fflat hi ar dân wedi cael ei garcharu am bedair blynedd.
Cafwyd Lloyd Jenkins, o Richard John Road yn Aberdaugleddau, yn euog o gynnau tanau'n fwriadol, ymosod a difrod troseddol yn dilyn achos dau ddiwrnod yn Llys y Goron Abertawe.
Cafodd yr heddlu eu galw ddydd Sul, 16 Hydref 2022, pan adroddodd partner Jenkins ei fod wedi gweld mwg yn dod o’i fflat hi. Dywedodd wrth swyddogion fod Jenkins wedi ymosod arni yn ystod ffrae ac wedi bygwth llosgi ei chartref wrth iddi ffoi oddi wrtho.
Rhoddwyd Jenkins ar restr ‘ar ffo’ ar unwaith, gyda swyddogion yn edrych yn rhagweithiol i arestio'r dyn 33 oed.
Canfu ymchwiliad fod tanau wedi'u cychwyn yn fwriadol yn y popty ac ar lawr y gegin. Achoswyd difrod mwg sylweddol drwy'r fflat, lle'r oedd cŵn y dioddefwr ar y pryd, ac roedd eitemau, gan gynnwys teledu, wedi'u torri'n fwriadol.
Arestiwyd Jenkins ddau ddiwrnod yn ddiweddarach ac fe'i cyhuddwyd o gynnau tanau'n fwriadol yn ddi-hid ynghylch p'un a oedd bywyd mewn perygl, ymosod drwy guro, a difrod troseddol. Gwadodd bob un o’r tri chyhuddiad.
Cafodd rheithgor ef yn euog o bob trosedd, ac mae wedi cael ei ddedfrydu i bedair blynedd yn y carchar.
Dywedodd y Ditectif Gwnstabl Vincent Beer o Heddlu Dyfed-Powys: “Gall fod yn anodd iawn i ddioddefwyr troseddau domestig adrodd i’r heddlu gan eu bod yn ofni y gallai canlyniadau gwneud hynny fod yn ormod. Yn aml, mae ganddynt les eu plant i’w ystyried, yn ogystal ag unrhyw darfu ar eu bywydau os oes rhaid iddynt symud allan o’u cartref neu fyw mewn llety brys.
“Hoffwn ganmol y dioddefwr yn yr achos hwn am ei dewrder wrth siarad allan, ac am ei chydweithrediad yn ystod ein hymchwiliad. Diolch iddi hi, y swyddogion dan sylw a’i heiriolwr trais domestig annibynnol, llwyddwyd i sicrhau tystiolaeth gref yn erbyn Jenkins, sy’n amlwg yn unigolyn peryglus iawn.”
*Os ydych yn profi cam-drin domestig ac angen cyngor, cefnogaeth neu help i adrodd amdano i ni, cliciwch yma Cyngor am gam-drin domestig | Heddlu Dyfed-Powys