Carcharu rhedwyr cyffuriau o Aberteifi am wyth mlynedd a hanner

MAE dau ddyn a wnaeth ddeg taith yn cludo cyffuriau o Aberteifi i Gasnewydd mewn cyfnod o ddau fis wedi’u carcharu am gyfanswm o wyth mlynedd a hanner.

Canfuwyd bod Daniel Liam Meyler, 42 oed, a Patrick Byrne, 49 oed, y ddau o Faes y Deri, Aberteifi, wedi cuddio heroin gwerth dros £5,000 y tu mewn i’w cyrff pan stopiwyd nhw gan yr heddlu ym mis Hydref 2021.

Roedd swyddogion Heddlu Dyfed-Powys wedi amau bod y ddau yn gyrru i Gasnewydd ac yn ôl i Geredigion i gasglu heroin, gyda chudd-wybodaeth yn dangos bod car Meyler wedi gwneud yr un daith ddeg gwaith rhwng 10 Awst a 16 Hydref.

Arestiwyd y dynion ar amheuaeth o fod yn rhan o gylch cyflenwi cyffuriau. Yn ddiweddarach, cynhyrchwyd 11 pecyn o heroin yr oeddent wedi’u ‘plwgio’ y tu fewn i’w cyrff. Cyfanswm gwerth stryd y cyffuriau yr oeddent wedi’u cuddio oedd £5,100.

Honnodd y ddau fod yr heroin ar eu cyfer nhw eu hunain, ond diystyrodd arbenigwr cyffuriau yn ddiymdroi fod y swm yn gyson â defnydd personol, a chyhuddwyd nhw o feddu ar heroin gyda’r bwriad o’i gyflenwi.

Gwadodd Meyler y cyhuddiad ond fe’i cafwyd yn euog gan reithgor yn dilyn achos llys tri diwrnod. Dedfrydwyd ef i bedair blynedd a chwe mis yn y carchar.

Cyfaddefodd Byrne y drosedd a dedfrydwyd ef i dair blynedd a naw mis yn y carchar.

Dywedodd swyddog yr achos, y Ditectif Ringyll Steve Jones: “Mae’r ddau ddyn hyn yn ymwybodol o’r effaith ddinistriol y gall heroin ei chael, ac eto roedden nhw’n mynnu bod yn gyfrifol am gyflenwi’r cyffur yn ardal de Ceredigion.

“Nid yn unig y gwnaethon nhw geisio cuddio’r cyffuriau, ond gwnaethon nhw hefyd wadu eu cynllun i’w werthu ymlaen unwaith iddyn nhw ddychwelyd i Aberteifi.

“Diolch i waith di-baid ein swyddogion, mae’r ffynhonnell hon o heroin bellach wedi’i hatal, a’r gobaith yw y bydd hyn yn anfon neges i ddelwyr cyffuriau eraill ein bod yn olrhain eu symudiadau ac y byddwn yn eu hatal nhw hefyd.”