Deliwr cyffuriau ‘toreithiog’ o Sir Benfro Andrew Lowndes wedi'i garcharu

Mae dyn a gafodd ei ddisgrifio gan yr heddlu fel un o ddelwyr cyffuriau ‘mwyaf toreithiog’ Sir Benfro wedi cael ei garcharu am bedair blynedd a hanner.

Y diwrnod y cafodd Andrew Lowndes ei stopio gan Heddlu Dyfed-Powys, roedd yn teithio yn ôl i Sir Benfro o ardal Heddlu De Cymru ac roedd yn cael ei amau o wneud y daith i gasglu heroin.

Gan wybod ei fod yn mynd i gael ei chwilio gan swyddogion, cuddiodd y dyn 52 oed hanner owns o’r cyffur dosbarth A o dan sedd gefn y car heddlu y cafodd ei gadw ynddo.

Sylwodd un o’r swyddogion a oedd wedi stopio ei gerbyd ei fod yn gwingo ar y sedd ar y ffordd i’r ddalfa, a daeth o hyd i’r celc o heroin a oedd wedi’i lapio â clingfilm werth tua £1,390.

Datgelodd chwiliad o'i gartref glorian pwyso digidol ac eitemau eraill sy'n gysylltiedig â defnyddio a chyflenwi heroin, a derbyniwyd negeseuon ar ffôn symudol Lowndes gan bobl yn gofyn am brynu cyffuriau.

Cafodd ei gyhuddo o fod â chyffur dosbarth A yn ei feddiant gyda’r bwriad o’i gyflenwi. Gwadodd y cyhuddiad i ddechrau ond cyfaddefodd iddo yn ddiweddarach yn y llys.

Cafodd Lowndes ei ddedfrydu i bedair blynedd a hanner yn y carchar pan ymddangosodd yn Llys y Goron Abertawe ddydd Llun, Ebrill 17.

Dywedodd swyddog Heddlu Dyfed-Powys yn yr achos y Ditectif Ringyll Vinny Barrett: “Mae Andrew Lowndes yn un o werthwyr cyffuriau dosbarth A mwyaf toreithiog a hirsefydlog Sir Benfro, ac mae’n siŵr y bydd ei garchariad yn cael effaith ar y cyflenwad o heroin yn yr ardal.”