Carcharu dyn am herwgipio a threisio merch yn ei harddegau yn ystod ymosodiad treisgar a barodd 12 awr

Heddiw, mae dyn 48 oed a achosodd merch yn ei harddegau i ddioddef ymosodiad rhywiol a threisgar 12 awr o hyd wedi derbyn dedfryd estynedig o 30 mlynedd yn Llys y Goron Abertawe.

Herwgipiodd Phillip Andrew Williams o Sgwâr y Farchnad, Llanymddyfri, y ferch ar nos Fawrth 2 Awst 2022. Dygodd ei ffôn symudol a daliodd sgriwdreifer i’w gwddf, a’i gorfodi i yfed alcohol a chymryd cocên cyn clymu ei dwylo a’i threisio mewn cae yn ardal Llanymddyfri. 

Yna, llusgodd Williams hi i mewn i gerbyd a oedd wedi’i ddwyn ac ymosod arni’n gorfforol eto cyn gyrru i Barc Gwledig Margam dan ddylanwad.  

Ym Margam, ceisiodd Williams lusgo’r dioddefydd tuag at fynydd, fodd bynnag, llwyddodd i fachu ei ffôn symudol a rhedeg i ffwrdd cyn hysbysu’r heddlu fore ddydd Mercher 3 Awst.  

Cyrhaeddodd swyddogion ychydig yn ddiweddarach a chanfod y ferch â mwd drosti ac mewn gofid mawr.

Datgelodd beth oedd wedi digwydd iddi, gan arwain yr heddlu i ganfod lleoliad ei hymosodiad cychwynnol. Yno, daethant o hyd i dystiolaeth a oedd yn ateb ei disgrifiad o’r ymosodiad, sef esgidiau rhedeg a dillad isaf y dioddefydd, sgriwdreifer a darn o raff glas mewn mwd gwlyb.

Yn y cyfamser, ceisiodd Williams osgoi’r heddlu a dechreuodd swyddogion o Heddlu Dyfed-Powys a Heddlu De Cymru chwilio amdano. Daethpwyd o hyd iddo’n gyflym. Cafodd ei arestio, ac mewn dim ond 36 awr, cafodd ei gyhuddo a’i remandio i’r llys.

Y cyhuddiadau yn ei erbyn oedd:

1. Annog plentyn i gymryd rhan mewn gweithgarwch rhywiol
2. Ymosodiad gan achosi gwir niwed corfforol
3. Treisio benyw 
4. Treisio benyw 
5. Treisio benyw 
6. Herwgipio
7. Ymosod yn rhywiol ar ferch dan 16 oed

Er y dystiolaeth yn ei erbyn, plediodd Williams yn ddieuog i’r holl gyhuddiadau, gan orfodi ei ddioddefydd i fynd trwy’r profiad o dreial, a ddechreuodd ddydd Llun 23 Ionawr yn Llys y Goron Abertawe.

Dywedodd yr Uwch Swyddog Ymchwilio, y Ditectif Arolygydd Dale Thomas: “Rywsut neu’i gilydd, meddyliodd Williams y gallai osgoi cael ei gosbi am yr hyn a wnaeth, ond diolch i ymdrechion y tîm ymchwilio a dewrder y dioddefydd, yn dilyn treial a barodd pum diwrnod, cafodd y rheithgor ef yn euog o bob cyhuddiad mewn dim ond 40 munud.  

“Gweithiodd y swyddog yn yr achos, y Ditectif Gwnstabl Jade Probert, yn ddiflino er mwyn paratoi a chwblhau achos llawn a chynhwysfawr ar gyfer y llys, ac ar yr un pryd, rhoddodd gymorth ac arweiniad drwy gydol y broses i’r dioddefydd.  

“Roedd modd inni sicrhau nad oedd rhaid i’r dioddefydd fynd i’r llys i roi ei thystiolaeth, ond heb  os, byddai’r ffaith bod ei hymosodwr wedi gwrthod derbyn yr hyn a wnaeth wedi ychwanegu at y boen a achosodd iddi.

“Hoffwn ganmol y dioddefydd am y dewrder y mae wedi dangos drwy gydol yr ymchwiliad.

“Rwy’n gobeithio bod hyn yn sicrhau pobl na fydd Heddlu Dyfed-Powys yn dioddef troseddau mor erchyll ac yn rhoi hyder i unrhyw un sydd wedi dioddef ymosodiad o’r fath i ddod ymlaen.”

“Byddwn ni’n gwrando ac yn gweithio’n ddiflino i gael cyfiawnder ichi.”

Roedd Williams nôl yn Llys y Goron Abertawe heddiw pan gafodd ei ddedfrydu i 22 mlynedd o garchar, wedi’i estyn am 8 mlynedd ar drwydded.