Gwnaeth Tarian 269 o arestiadau ac atafaelu mwy na 460kg o gyffuriau yn 2022

Gwnaeth Tarian, Uned Troseddau Cyfundrefnol Ranbarthol de Cymru, sy'n gweithio gyda heddluoedd a phartneriaid de Cymru 269 o arestiadau ac atafaelu mwy na 460kg o gyffuriau yn ystod 2022.

Mae Tarian yn gyfrifol am fynd i'r afael â throseddau difrifol a chyfundrefnol ledled de Cymru a rheoli'r bygythiad gan droseddau fel cyflenwi arfau tanio, llinellau cyffuriau, camfanteisio'n rhywiol ar blant, seiberdroseddau a chaethwasiaeth fodern.

Yn ystod 2022, arweiniodd ymchwiliadau gan Tarian at 269 o arestiadau, 211 o droseddwyr yn cael eu carcharu am gyfanswm o 763 o flynyddoedd a thua 449kg o gyffuriau yn cael eu tynnu oddi ar y strydoedd. Mae Tarian wedi cefnogi heddluoedd ac asiantaethau partner eraill hefyd a arweiniodd at arestiadau a dedfrydau ychwanegol.

Defnyddiodd ein Huned Troseddau Economaidd Ranbarthol bwerau o dan y Ddeddf Enillion Troseddau er mwyn cael gorchmynion atafaelu yn erbyn troseddwyr sydd wedi'u heuogfarnu o £4,467,434.12, cadw bron i £400k mewn arian parod a chael asedau ymataliol o tua £4 miliwn gan droseddwyr.

Drwy gydol 2022, helpodd ein Tîm Llinellau Cyffuriau ein tri heddlu yn ne Cymru ar sawl ymchwiliad, a helpu i amddiffyn oedolion a phlant sy'n agored i niwed rhag cael eu camfanteisio gan gangiau cyffuriau.

Ymhlith uchafbwyntiau'r ymchwiliadau roedd:

• Ymgyrch Arcturus: Cafodd chwe aelod o grŵp troseddau cyfundrefnol a gyflenwodd werth hyd at £5,022,000 o gyffuriau o ansawdd uchel eu carcharu am gyfanswm o 87 o flynyddoedd.
• Ymgyrch Oberon: Cafodd 14 o aelodau o grŵp troseddau cyfundrefnol a oedd yn rhan o rwydwaith cyffuriau mawr eu carcharu am dros 140 o flynyddoedd.
• Cafodd 384 o blant a 32 o oedolion eu diogelu rhag cael eu camfanteisio gan droseddwyr.
• Atafaelodd y Tîm Gorfodi Atafaelu Asedau, sy'n rhan o'r Uned Troseddau Economaidd Ranbarthol, £548,241.07 o'r gorchmynion gorfodi atafaelu blaenorol.

Dywedodd y Ditectif Uwch-arolygydd Nick Wilkie, pennaeth yr uned troseddau cyfundrefnol:

“Bu'n flwyddyn hynod lwyddiannus arall i Tarian yn ein hymdrechion i fynd i'r afael â throseddau cyfundrefnol yn y rhanbarth.

"Diolch i waith caled ein swyddogion a'n hasiantaethau partner, treuliodd nifer mawr o droseddwyr cyson y Nadolig yn y carchar, ac rydym wedi cymryd symiau sylweddol o gyffuriau ac arfau tanio anghyfreithlon oddi ar y strydoedd.

"Rydym yn edrych ymlaen at barhau â'r frwydr yn erbyn troseddau difrifol a chyfundrefnol yn 2023, a diogelu pobl ledled de Cymru rhag niwed."