Dedfrydu dyn i bum mlynedd o garchar am werthu cyffuriau yn Aberystwyth

Canfu bod dyn a gafodd ei arestio ar ôl cael ei ddal yn cymryd cyffuriau ar y stryd yn Aberystwyth yn werthwr gweithredol, a bellach, y mae wedi’i garcharu am bum blynedd a hanner.

Galwodd aelod o’r cyhoedd Heddlu Dyfed-Powys i ddweud ei fod wedi gweld dau unigolyn yn cymryd tabledi glas ar Stryd y Gorfforaeth nos Fercher 15 Gorffennaf 2020, a bod sylwedd glas o gwmpas eu cegau.

Aeth swyddogion i’r lleoliad a gwelsant Robert Thomas, 41 oed, yn dod allan o’i gyfeiriad ar Stryd y Gorfforaeth, â phowdwr glas o gwmpas ei wefusau.

Cafodd ei stopio a’i chwilio, a daethpwyd o hyd i nifer o dabledi gwyn a glas yn ei feddiant, gan arwain at ei arést.

Yna, chwiliodd swyddogion gartref Thomas, gan ddod o hyd i fag a oedd yn cynnwys 3g o ganabis llysieuol, yn ogystal â thafol fach a 0.77g o ganabis o dan ei wely.

Wedi hyn, daeth swyddogion o hyd i 101,000 o dabledi gwyn a glas mewn cynwysyddion amrywiol, gan gynnwys dau fwced mawr, a oedd yn cynnwys miloedd o dabledi.  

Wrth gael ei dderbyn i’r ddalfa, chwiliwyd Thomas ymhellach, a daethpwyd o hyd i ragor o dabledi glas mewn bag snap rhwng bochau ei ben ôl, £480 mewn arian parod, a ffôn symudol o wneuthuriad Motorola.

Credir bod Thomas wedi swmp-brynu’r hyn a gredai oedd yn dabledi Diasepam ar y rhyngrwyd i’w gwerthu ymlaen.

Fodd bynnag, datgelodd profion fforensig mai Flualprasolam oedd 3,211 ohonynt, a ddaw dan Ddeddf Sylweddau Seicoweithredol 2016, ac mai tabledi parasetamol wedi’u lliwio’n las oedd y 97,814 a oedd yn weddill.

Pe bai’r rhain wedi’u gwerthu fel Diasepam, byddai gwerth y tabledi a atafaelwyd ar y stryd rhwng £101,000 a £202,000 pe baen nhw’n cael eu gwerthu’n unigol, neu £40,000 pe baen nhw’n cael eu cyfanwerthu.

Daeth swyddogion o hyd i olion cocên ar y dafol hefyd.

Yn ystod cyfweliad, cadarnhaodd Thomas ei fod wedi talu £12,000 yr un am y tybiau mawr, ond honnodd ei fod wedi derbyn mwy nag yr oedd wedi’i archebu ac nad oedd yn eu gwerthu ymlaen.

Fodd bynnag, pan edrychodd swyddogion ar ffôn Thomas, daethant o hyd i dystiolaeth sylweddol bod cyffuriau’n cael eu gwerthu, gan ganfod cynigion i werthu cocên, MDMA, amffetaminau, canabis a Diasepam.

Dywedodd y Ditectif Ringyll Steven Jones: “Yn dilyn gwaith da gan ein swyddogion, o’r rhai a ymatebodd i’r alwad gychwynnol i’r rhai a fu’n gysylltiedig â’r ymchwiliad dilynol, llwyddom i ddangos bod Thomas yn werthwr gweithredol a oedd yn gwerthu cyffuriau ar raddfa fawr yng Ngheredigion.

“Mae’r achos hwn yn dangos ein bod ni’n medru erlyn y rhai sy’n gysylltiedig â gwerthu cyffuriau heb eu dal â’r cyffuriau yn eu meddiant.

“Hoffem ddiolch i’r unigolyn a roddodd wybod inni bod Thomas yn cymryd cyffuriau ar y stryd, a gobeithiwn fod yr euogfarn hon yn helpu i sicrhau’r cyhoedd y byddwn yn gweithredu ar eu pryderon er mwyn sicrhau euogfarnau.”

Euogfarnwyd Thomas yn dilyn achos llys yn Llys y Goron Abertawe. Dychwelodd yno i gael ei ddedfrydu ddydd Gwener 20 Ionawr.  

Am gynnig gwerthu cocên ac MDMA, cafodd ei  ddedfrydu i bum mlynedd a hanner o garchar am bob un. Am gynnig gwerthu amffetamin a chanabis, cafodd ei ddedfrydu i 12 mis o garchar am bob un. Fe’i dedfrydwyd i chwe mis o garchar am gynnig gwerthu Diasepam.

Bydd pob dedfryd yn rhedeg ar y cyd, sy’n golygu mai pum mlynedd a hanner yw cyfanswm ei ddedfryd.