Hedfan dronau er mwyn helpu i atal damweiniau ar ffyrdd Powys

Mae dronau’n cael eu defnyddio gan swyddogion sydd wedi’u hyfforddi’n arbennig er mwyn helpu i fonitro, adnabod, ac, os oes angen, erlyn defnyddwyr ffyrdd sy’n gyrru neu’n reidio’n beryglus mewn mannau problemus o ran damweiniau ar ffyrdd Powys.

Mae gan Heddlu Dyfed-Powys rai o’r llwybrau mwyaf poblogaidd yn y DU ar gyfer gyrwyr a beicwyr modur, a nawr bod yr haf wedi cyrraedd, mae’n croesawu nifer fawr o ddefnyddwyr ffyrdd i’r ardal heddlu i fwynhau’r golygfeydd godidog.  

Yn anffodus, mae nifer fach o feicwyr modur a modurwyr yn parhau i yrru’n beryglus, yn ddi-hid neu’n wrthgymdeithasol, sy’n effeithio ar eu diogelwch nhw a defnyddwyr ffyrdd eraill.

Adlewyrchir hyn yn nifer y bobl sy’n cael eu hanafu’n ddifrifol neu eu lladd ar ffyrdd Powys – y llynedd, bu 90 gwrthdrawiad lle cafodd pobl eu hanafu’n ddifrifol a 13 marwolaeth yn y sir.

Nid yn unig y mae’r digwyddiadau hyn wedi bod yn straen ar adnoddau, yn bwysicach na hynny, maen nhw wedi achosi oes o dor calon ar gyfer teuluoedd sydd wedi colli anwyliaid neu rywun sydd wedi dioddef anafiadau sydd wedi newid ei fywyd.

Mewn ymgais i wyrdroi’r duedd bryderus hon, mae’r heddlu’n hedfan ei ddronau er mwyn helpu swyddogion i adnabod pobl sy’n cyflawni symudiadau peryglus mewn mannau sy’n adnabyddus am ddamweiniau ffyrdd.

Dywedodd yr Arolygydd Gareth Earp: “Mae ein Huned Plismona’r Ffyrdd, mewn partneriaeth â GanBwyll, yn paratoi ar gyfer y tymor ymwelwyr sydd ar ddod, ac yn canolbwyntio ar wella diogelwch ar y ffyrdd ac ymddygiad gyrru.

“Pob blwyddyn, yr ydym yn croesawu miloedd o ymwelwyr i’r siroedd hardd sy’n ffurfio ardal Dyfed-Powys, ac fel uned, yr ydym wedi ymrwymo i sicrhau bod ymwelwyr a phreswylwyr fel ei gilydd yn rhydd i deithio’n ddiogel rhag niwed.

“Yn unol â’n hamcanion i wella diogelwch ar y ffyrdd fel rhan o Ymgyrch Darwen a Phrosiect EDWARD (Pob Dydd Heb Farwolaeth ar y Ffyrdd), bydd swyddogion o’n Huned Plismona’r Ffyrdd yn awr yn cael cwmni swyddogion o’n huned ddronau arbenigol a’r tîm GanBwyll yn rheolaidd, a byddant yn cydweithio er mwyn targedu’r nifer fach hon o unigolion di-hid.

“Nod ganolog yr ymagwedd ar y cyd hon yw gwella diogelwch ar y ffyrdd, gydag addysgu a dileu ymddygiad di-hid yn egwyddor graidd, ynghyd â chymryd camau gorfodi pan fod angen.”

Mae Heddlu Dyfed-Powys yn defnyddio’r offer arbenigol i adnabod pobl sy’n cyflawni’r 5 trosedd angheuol, megis gyrru diofal, goryrru a defnyddio ffôn symudol. Mae swyddogion ar y tir yn cael gwybod am droseddau posibl er mwyn iddynt fynd ar eu trywydd.  

Ychwanegodd yr Arolygydd Earp: “Bydd swyddogion yn cymryd ymagwedd hynod dargedig tuag at y fenter gyfunol newydd hon, a bydd gweithgareddau’n canolbwyntio’n ofalus ar fannau problemus allweddol sydd wedi’u nodi drwy ddata gwrthdrawiadau a gwybodaeth berthnasol arall.

“Yr ydym yn cydnabod y gallai rhai aelodau o’r cyhoedd fod yn bryderus ynghylch y defnydd ehangach o ddronau heddlu, a hoffem eu sicrhau bod hyn yn ymwneud â gwella diogelwch y ffyrdd ar gyfer pob defnyddiwr ffordd, ac mai dim ond arf arall ydyw sydd yn awr ar gael inni i’n cynorthwyo â’n cenhadaeth i leihau gwrthdrawiadau, atal niwed a hyrwyddo mwynhad diogel o’n hardal heddlu hardd gan breswylwyr ac ymwelwyr fel ei gilydd.”