Diogelwch Ffyrdd Cymru - Gweld a chael eich Gweld!

Wrth i'r clociau fynd yn ôl y penwythnos yma, mae cyfnodau hirach o dywyllwch yn y bore a gyda'r nos, ochr yn ochr ag amodau tywydd gwaeth, yn golygu y gall y risgiau o fod yn rhan o wrthdrawiad traffig ffyrdd gynyddu.

Mae Diogelwch Ffyrdd Cymru yn cynghori defnyddwyr y ffyrdd fod angen paratoi a chymryd gofal ychwanegol mewn amodau tywyllach. Yn y tywyllwch, mae'n bwysicach byth bod gyrwyr yn chwilio am bob defnyddiwr ffordd sy’n
agored i niwed, a ddylai hefyd ystyried pa mor hawdd i’w gweld ydyn nhw.

Mae'r terfyn cyflymder 20mya diofyn newydd mewn ardaloedd adeiledig ledled Cymru yn golygu bod gan yrwyr fwy o amser i adnabod peryglon ac i yrru'n briodol yn ymyl pobl eraill. Yn anffodus, fodd bynnag, allan ni ddim cymryd yn
ganiataol bod gyrwyr yn cydymffurfio â’r gofynion. Mae gyrwyr sy'n troseddu yn dal i’w cael ac mae angen i bob un ohonom sy'n defnyddio'r ffyrdd aros yn effro i ymddygiad gyrru gwael ac anghyfreithlon er mwyn lleihau ein risg o gael
ein hanafu.

Dywedodd Teresa Ciano, Cadeirydd Diogelwch Ffyrdd Cymru,

"Ar unrhyw adeg o'r flwyddyn, rhaid i yrwyr gadw at gyfraith traffig ffyrdd bob amser a dilyn y rheolau a'r canllawiau yn Rheolau'r Ffordd Fawr.
"Mewn tywydd tywyll a newidiol mae'n hanfodol bod gyrwyr yn gallu gweld defnyddwyr ffyrdd bregus ac yn gallu arafu a dod â'u cerbyd i stop yn ddiogel.
"Rydyn ni’n annog gyrwyr i wirio bod eu cerbyd mewn cyflwr sy'n addas i'r ffordd. Rhaid i bob teiar fod heb eu difrodi, gyda digon o afael a bod wedi’u chwythu i'r pwysau cywir.
"Rhaid i bob golau fod yn lân ac yn gweithio'n iawn, gyda’r botel hylif golchi’n llaw i gadw'r ffenestr flaen yn glir; mae’r gallu i weld pobman heb rwystr yn hanfodol ar gyfer gyrru'n ddiogel ac amddiffyn defnyddwyr ffyrdd sy'n agored i
niwed.
"Gall cerddwyr a beicwyr gynyddu eu hamlygrwydd yn hawdd trwy wisgo lliwiau llachar yn ystod y dydd, ac yn y tywyllwch dewis ategolion adlewyrchol, esgidiau neu ddillad a all gael eu gweld yng ngoleuadau cerbydau.
"Mae croesi'r ffordd wrth fannau croesi pwrpasol pryd bynnag y bo modd bob amser yn opsiwn mwy diogel, yn enwedig wrth gerdded neu reidio yn y tywyllwch."

Atgoffir beicwyr fod rhaid cael golau blaen gwyn a golau cefn coch ar eu beic wrth reidio, tra gall cerddwyr wneud defnydd da o dorts safonol neu dorts ffôn symudol.

Gall aelodau o'r cyhoedd sydd wedi gweld troseddau gyrru riportio pethau ac uwchlwytho tystiolaeth fideo neu ffotograffig yma: gosafesnap.cymru

Mynnwch weld a chael eich gweld ar y ffordd yr hydref yma a chwarae eich rhan i leihau nifer yr anafiadau ar y ffyrdd yng Nghymru.