Arestio chwech mewn cysylltiad â phrotestiadau yng Ngwesty Parc y Strade, Llanelli

Gwnaed chwe arést dros benwythnos dydd Sadwrn 30 Medi i ddydd Sul 1 Hydref 2023, yn dilyn cyfres o ddigwyddiadau pryderus yng Ngwesty Parc y Strade.

Am oddeutu 10.25 o’r gloch nos Sadwrn (30 Medi), derbyniodd Heddlu Dyfed-Powys adroddiadau bod cerbyd ar dân ar dir y gwesty. Diffoddwyd y tân yn gyflym gan swyddog heddlu ac ni adroddwyd am unrhyw anafiadau.  

Arestiwyd dyn 48 oed o Gaerffili, a dwy ddynes 53 a 52 oed o Cleveland a Peterborough, ar amheuaeth o losgi bwriadol a throseddau eraill. Maen nhw wedi’u rhyddhau ar fechnïaeth tra bod yr heddlu’n cynnal ymholiadau pellach.

Brynhawn ddydd Sul (1 Hydref), cynhaliwyd protest ‘gyrru heibio’ wedi’i drefnu gan ymgyrchwyr yn lleoliad y gwesty. Gorfododd nifer o’r beicwyr modur eu ffordd i mewn drwy’r brif fynedfa, er bod swyddogion lifrog yn sefyll yn eu ffordd, Yn ffodus, ni anafwyd unrhyw swyddogion.

Yna, gwthiodd nifer fawr o brotestwyr y ffensys diogelwch drosodd a gorfodi eu ffordd i mewn i dir y gwesty. Achosodd rai difrod i’r gwesty drwy falu’r ffenestri. Bydd TCC a chamerâu corff yn awr yn cael eu hadolygu er mwyn nodi troseddau a throseddwyr.

Am 10.30 o’r gloch y noson honno, adroddwyd am dân ym mhwll grisiau’r gwesty. Ar yr un pryd, taflwyd tân gwyllt a thaflegrau eraill tuag at swyddogion tra bod cerbydau’n cael eu symud, mewn ymgais i atal mynediad i wasanaeth Tân Canolbarth a Gorllewin Cymru. Diffoddwyd y tân ac ni adroddwyd am unrhyw anafiadau.  

Arestiwyd dyn 40 oed a dynes 44 oed o ardal Caerfyrddin ar amheuaeth o losgi bwriadol, ac arestiwyd dyn 66 oed o Lanelli ar amheuaeth o rwystro’r gwasanaethau brys. Maen nhw wedi’u rhyddhau ar fechnïaeth tra bod yr heddlu’n cynnal ymholiadau pellach.

Mae’r ymchwiliad i’r digwyddiadau hyn yn mynd rhagddo a disgwylir arestiadau pellach. Mae swyddogion dal yn lleoliad y gwesty er mwyn tawelu meddyliau preswylwyr a’r gymuned.

Dywedodd Comander Sir Gaerfyrddin, yr Uwch-arolygydd Ross Evans:

“Cadw ein cymunedau’n ddiogel yw ein blaenoriaeth, ac fel heddlu, byddwn bob amser yn anelu at hwyluso protest heddychlon, gan ddal y ddysgl yn wastad rhwng hawliau eraill, cadw’r cyhoedd yn ddiogel, ac atal trosedd ac anhrefn. Fodd bynnag, mae ymddygiad rhai unigolion wedi mynd ymhell tu hwnt i hyn dros y dyddiau diwethaf.

“Daw’r arestiadau diweddaraf hyn yn dilyn dwysâd pryderus o ran ymddygiad rhai protestwyr, sydd wedi arwain at ddifrod sylweddol i eiddo’r gwesty unwaith yn rhagor.

“Ni fydd Heddlu Dyfed-Powys yn dioddef ymddygiad anghyfreithlon – nid yw protest yn rhoi esgus i gyflawni tramgwyddau troseddol. Pan mae trosedd yn cael ei chyflawni, byddwn yn cymryd pob cam rhesymol a chymesur i ddwyn troseddwyr i gyfiawnder.  

“Diogelwch y cyhoedd yw ein blaenoriaeth o hyd, a byddwn yn parhau i wrando ar bob parti a gweithio gyda nhw.

“Hoffwn achub ar y cyfle hwn i ddiolch i’r rhai sydd wedi gwrthdystio’n heddychlon dros yr wythnosau diwethaf, ac apelio am lonyddwch unwaith yn rhagor. Hoffwn ddiolch hefyd i’r tîm sydd wedi ymdrin â’r anhrefn ar safle’r gwesty dros y dyddiau diwethaf – maen nhw wedi gwneud hyn o dan amgylchiadau anodd iawn.

“Anogaf unrhyw un sy’n bwriadu ymuno â’r brotest i ddilyn yr enghraifft sydd wedi’i gosod gan breswylwyr lleol.”

• Os ydych chi’n bwriadu cynnal protest, neu os oes gennych unrhyw wybodaeth am yr hyn a ddigwyddodd dros y penwythnos, cysylltwch â’r heddlu drwy gyfryngau cymdeithasol, drwy ein gwefan ar https://www.dyfed-powys.police.uk/cy-GB/cysylltu-a-ni/af/cysylltu-a-ni-beta/cysylltu-a-ni/, drwy anfon e-bost at [email protected], neu drwy alw 101.
• Os ydych chi’’n fyddar neu’n drwm eich clyw, neu os oes gennych nam ar eich lleferydd, anfonwch neges destun at y rhif difrys 07811 311 908.