Carcharu masnachwr cyffuriau “dylanwadol” o Sir Benfro

Mae dyn a gafodd ei ddal â gwerth £15,000 o gyffuriau dosbarth A a B a mwy na £18,000 mewn arian parod dros bedwar arést wedi’i garcharu. 

Cafodd Maximus Goldsworthy, 22 oed, o Abergwaun, ei arestio bedwar gwaith rhwng 2021 a 2023. Bob tro y cafodd ei arestio, daethpwyd o hyd i lawer iawn o gocên, canabis, MDMA ac arian parod yn ei feddiant.

Ag yntau’n cael ei amau o fod yn gysylltiedig â masnachu cyffuriau, cynhaliwyd ymchwil trylwyr i weithredoedd Goldsworthy gan Heddlu Dyfed-Powys, a chafwyd digon o dystiolaeth i sicrhau’r cyhuddiadau canlynol:

*Bod yn gysylltiedig â gwerthu cocên rhwng Mai 2021 ac Ebrill 2022

*Meddu â’r bwriad o werthu cocên

*Meddu ar eiddo troseddol (£8,100 mewn arian parod)

*Meddu ar eiddo troseddol (£4,983.35 mewn arian parod)

*Meddu ar arf saethu ffug llwythog   

*Meddu â’r bwriad o werthu cyffur dosbarth B – canabis (x3)

*Meddu â’r bwriad o werthu cyffur dosbarth A - MDMA

O ganlyniad i gryfder y dystiolaeth a gasglwyd yn ystod ymholiadau’r heddlu, cyfaddefodd Goldsworthy i’r holl droseddau. Ymddangosodd yn Llys y Goron Abertawe ddydd Iau 14 Medi, lle y cafodd ei ddedfrydu i gyfanswm o bedair blynedd a hanner o garchar.

Dywedodd y swyddog yn yr achos, y Ditectif Gwnstabl Emma Morgans: “Roedd hwn yn ganlyniad ardderchog diolch i benderfynoldeb swyddogion wrth iddynt archwilio i flynyddoedd o symudiadau, cyfnewidiadau digidol a thrafodion ariannol a wnaed gan Goldsworthy.

“Roedd y troseddwr hwn yn ddylanwadol iawn o ran cyflenwi cyffuriau anghyfreithlon i Sir Benfro, a gobeithiwn y bydd y gwaith hwn wedi aflonyddu ar argaeledd y sylweddau hyn.”