Mae sgriniau ystafell llys yn helpu dioddefwr i roi tystiolaeth mewn achos trosedd rhyw

Bydd treisiwr a lwyddodd i osgoi cyfiawnder am dros dri degawd yn treulio’r 15 mlynedd nesaf tu ôl i farrau cell, diolch i ddewrder ei ddioddefydd.  

Bydd treisiwr a lwyddodd i osgoi cyfiawnder am dros dri degawd yn treulio’r 15 mlynedd nesaf tu ôl i farrau cell, diolch i ddewrder ei ddioddefydd.  

Dedfrydwyd Evan Jones o Dre-fach Felindre, Llandysul, yn Llys y Goron Abertawe ddydd Iau 26 Hydref.  

Yn gynharach y mis hwn, cafwyd y dyn 67 oed yn euog o ddau achos o drais a naw ymosodiad rhywiol yn dyddio’n ôl i’r 1980au.

Rhyddfarnwyd ef o achos pellach o drais.  

Yr oeddent i gyd yn ymwneud â’r un dioddefydd, sef merch a oedd rhwng 8 ac 11 oed adeg y troseddau.

Dywedodd Damon Watmough, y Swyddog Ymchwilio, y bu cefnogi’r dioddefydd i roi tystiolaeth yn allweddol i ganlyniad yr achos.

“Yn ddealladwy, ar ôl yr holl flynyddoedd hyn, roedd meddwl am orfod wynebu ei chamdriniwr yn y llys yn rhywbeth a oedd yn achosi cryn bryder i’r dioddefydd,” meddai’r Ditectif Gwnstabl Watmough.

“Roedd ei thystiolaeth yn hollbwysig ar gyfer yr achos hwn, ac yn ffodus, roedd modd inni weithio gyda’r llysoedd er mwyn sicrhau ei bod hi wedi’i gwarchod gan sgrin yr holl amser, gan wneud iddi deimlo’n ddiogel wrth siarad am yr hyn ddigwyddodd.  

“Dim ond un o’r mesurau arbennig sydd ar gael i helpu i gefnogi dioddefwyr a thystion i roi tystiolaeth yn ystod achosion trawmatig yw sgriniau, a gallant wneud byd o wahaniaeth.”

Dedfrydwyd Jones gan y Barnwr Geraint Walters i 16 blynedd o garchar, a bydd yn rhaid iddo dreulio o leiaf 15 ohonynt dan glo, gyda blwyddyn bellach ar drwydded.

Cyhoeddwyd Gorchymyn Atal Niwed Rhywiol hefyd.

Ychwanegodd y Ditectif Gwnstabl Watmough: “Mae’n anodd dod ymlaen pan mae pethau wedi’u celu ers cymaint o amser, ond rwy’n gobeithio bod y canlyniad hwn yn dangos i eraill sydd wedi profi cam-drin hanesyddol nad yw byth yn rhy hwyr i godi llais.  

“Byddwn yn gwneud popeth o fewn ein gallu i gasglu tystiolaeth ac adeiladu achos, ni waeth pa mor hir yn ôl y digwyddodd y drosedd, a byddwn yn eich cefnogi drwy’r holl broses.”

Am fanylion ynghylch gwasanaeth cymorth a sut i adrodd am drosedd rywiol, gan gynnwys digwyddiadau nad ydynt yn rhai diweddar, galwch heibio i https://www.dyfed-powys.police.uk/cy-GB/riportio/riportio/riportiwch/alpha-v1/cyngor/treisio-ymosod-rhywiol-a-throseddau-rhywiol-eraill/sut-i-riportio-treisio-ymosodiad-rhywiol-troseddau-rhywiol-eraill/.

Os ydych chi wedi dioddef trosedd, rhowch wybod i Heddlu Dyfed-Powys ar-lein ar https://www.dyfed-powys.police.uk/cy-GB/cysylltu-a-ni/af/cysylltu-a-ni-beta/cysylltu-a-ni/, drwy anfon e-bost at [email protected], neu drwy alw 101.

Os ydych chi’n fyddar neu’n drwm eich clyw, neu os oes gennych nam ar eich lleferydd, anfonwch neges destun at y rhif difrys 07811 311 908.

Fel arall, cysylltwch â’r elusen annibynnol Taclo’r Tacle yn ddienw drwy alw 0800 555111, neu drwy alw heibio i crimestoppers-uk.org. 

Gwybodaeth bellach:

Mae mesurau arbennig ar gael i dystion diamddiffyn a thystion sy’n cael eu bygwth gyda chytundeb y llys.  

Maent yn cynnwys y cyfle i roi tystiolaeth drwy gyswllt byw (o ystafell arall o fewn y llys, neu o leoliad arall mewn rhai achosion), barnwyr a bargyfreithwyr yn diosg gwallt gosod a gynau, a chymhorthion cyfathrebu i helpu’r rhai sydd ag anableddau.

Sicrheir anhysbysrwydd am oes yn awtomatig ar gyfer dioddefwyr troseddau rhywiol o’r adeg y gwneir honiad.

Mae hyn yn golygu na all y cyfryngau gyhoeddi unrhyw wybodaeth a fyddai’n arwain at eu hadnabod.

Mae troseddau rhywiol yn cynnwys trais, ymosodiad rhywiol a thynnu ffotograff anweddus o blentyn.

Estynnir anhysbysrwydd i ddioddefwyr/dioddefwyr honedig anffurfio organau cenhedlu benywod hefyd, ac mewn rhai achosion, dioddefwyr masnachu mewn pobl a chaethwasiaeth fodern.

Yr unig eithriad yw lle mae dioddefydd (16 oed neu hŷn) yn dewis ildio’r hawl hwn, neu os yw llys yn gorchymyn bod anhysbysrwydd yn cael ei godi.