Mae’r heddlu yn parhau i ymchilio’r digwyddiad yn Ysgol Dyffryn Amman

Mae Heddlu Dyfed-Powys yn parhau i ymchwilio i’r digwyddiad difrifol a ddigwyddodd yn Ysgol Dyffryn Aman yn Sir Gaerfyrddin y bore yma

Dywedodd yr Uwch Arolygydd Ross Evans:

“Derbyniom alwad ychydig ar ôl 11.20y.b. yn dweud wrthym fod pobl wedi’u hanafu yn dilyn digwyddiad yn yr ysgol.

“Aeth y gwasanaethau brys yno’n syth, a gorfodwyd pawb i aros yn eu dosbarthiadau er diogelwch pawb ar y safle.

“Aed â dau athro a disgybl yn ei arddegau i’r ysbyty gydag anafiadau trywanu. Nid yw eu bywydau yn y fantol.

“Mae merch yn ei harddegau wedi’i harestio ar amheuaeth o geisio llofruddio ac mae yn nalfa’r heddlu o hyd.

“Mae cyllell wedi’i chasglu fel tystiolaeth.

“Rwy’n ymwybodol bod lluniau a fideos o'r digwyddiad yn cael eu rhannu ar gyfryngau cymdeithasol. Byddwn yn gofyn i hwn gael ei dynnu er mwyn osgoi bod mewn dirmyg llys ac achos gofid i'r rheiny sy'n gysylltiedig â'r digwyddiad.

“Gofynnwn i bobl beidio â cheisio dyfalu be ddigwyddodd tra bo ymchwiliad yr heddlu'n mynd rhagddo, a chyfeirio at sianeli swyddogol am ddiweddariadau ffeithiol.

“Bydd pobl leol yn gweld mwy o swyddogion heddlu yn yr ardal dros y dyddiau nesaf wrth i’r ymchwiliad barhau.

“Hoffwn sicrhau rhieni a’r cyhoedd bod y digwyddiad wedi dod i ben, a bod disgyblion bellach wedi gadael yr ysgol.

“Rydym yn gweithio gyda’r ysgol ac asiantaethau eraill i sicrhau bod cymorth priodol ar gael i bawb a oedd yn gysylltiedig â’r digwyddiad.

“Roedd hwn yn ddigwyddiad trallodus iawn, ac mae ein meddyliau gyda’r dioddefwyr, eu teulu a phawb sydd wedi’u heffeithio gan yr hyn sydd wedi digwydd.

“Rydym wedi sefydlu porth pwrpasol, a gofynnir i unrhyw un sydd â gwybodaeth a allai ein helpu gyda’n hymchwiliad ei chyflwyno drwy’r ddolen hon er mwyn helpu’r heddlu i reoli swm yr wybodaeth yr ydym yn ei derbyn.

“Yn olaf, hoffwn ddiolch i’r gymuned gyfan am ei chefnogaeth a’i hamynedd wrth i’r heddlu, y gwasanaethau brys, Cyngor Sir Gaerfyrddin a’r ysgol weithio drwy’r digwyddiad trallodus hwn heddiw a thros y dyddiau nesaf.”

Gofynnir i unrhyw un sydd â gwybodaeth a allai helpu swyddogion gyda’u hymchwiliad i roi gwybod i Heddlu Dyfed-Powys drwy’r Porth Cyhoeddus dynodedig.