Mae swyddogion heddlu dal yn Ysgol Dyffryn Aman yn dilyn digwyddiad difrifol

Mae swyddogion heddlu dal yn Ysgol Dyffryn Aman heddiw, yn dilyn digwyddiad ddoe lle y cafodd tri unigolyn eu hanafu. 

Bydd swyddogion yn yr ysgol drwy gydol y dydd wrth i’r ymchwiliad, sy’n cael ei arwain gan yr Adran Ymchwilio i Droseddau, fynd rhagddo.

Mae merch yn ei harddegau dal yn y ddalfa ar ôl cael ei harestio ar amheuaeth o geisio llofruddio.

Aed â dau athro a disgybl yn ei arddegau i’r ysbyty ag anafiadau ar ôl cael eu trywanu. Nid oedd eu bywydau yn y fantol, ac mae’r ddau athro wedi’u rhyddhau o’r ysbyty erbyn hyn.

Dywedodd Ross Evans, Uwch-arolygydd Sir Gaerfyrddin: “Fel y gellir ei ddisgwyl gyda digwyddiad mor ddifrifol â hwn, bydd swyddogion heddlu’n parhau i fod yn bresennol yn yr ysgol drwy gydol y dydd heddiw.

“Bydd swyddogion yn y lleoliad yn chwilio am dystiolaeth i gynorthwyo’r ymchwiliad, tra bydd timoedd arbenigol eraill yn dadansoddi unrhyw wybodaeth a gyflwynir drwy ein tudalen we benodol.

“Yr ydym yn deall lefel y pryder yn y gymuned wrth i bobl geisio prosesu’r digwyddiad. Anogwn unrhyw un sydd wedi’i effeithio gan ddigwyddiadau ddoe i geisio cymorth, ac i beidio â rhannu unrhyw fideos, ffotograffau neu wybodaeth a allai achosi gofid pellach i ddisgyblion neu rieni’r ysgol.

“Yr ydym yn parhau i gefnogi Cyngor Sir Gaerfyrddin ac asiantaethau eraill wrth iddynt roi cymorth i’r rhai yr effeithir arnynt gan ddigwyddiadau ddoe.

Gofynnir i unrhyw un sydd â gwybodaeth a allai helpu swyddogion gyda’u hymchwiliad i roi gwybod i Heddlu Dyfed-Powys drwy’r Porth Cyhoeddus dynodedig.