Anfon swyddogion Dyfed-Powys i helpu yng Ngemau Olympaidd 2024 ym Mharis

Hwyl fawr Dyfed-Powys, bonjour la France!

Mae swyddogion heddlu ar draws Heddlu Dyfed-Powys wedi croesi’r Sianel i ddarparu cyd-gymorth yng Ngemau Olympaidd a Pharalympaidd 2024 ym Mharis.

Mae’r heddlu’n cyfrannu at gymorth plismona’r DU yn y gemau yn Ffrainc, gyda phedwar swyddog a chi heddlu’n cael eu hanfon i’r digwyddiad wyth wythnos o hyd.

Mae’r Rhingyll Grace Coburn o’r Drenewydd, Cwnstabl Sophie Webber o Hwlffordd, Cwnstabl Sophie Maliphant o Gaerfyrddin, a Chwnstabl Mike Barnsley, triniwr ci canfod ffrwydron, a’r ci heddlu Doug, i gyd wedi chwarae eu rhan yn yr ymgyrch diogelwch ac ymgysylltu. Maen nhw wedi cynnal patrolau cyffredinol yn y safleoedd Olympaidd allweddol yn Ffrainc ac o’u cwmpas, gan sicrhau diogelwch lleoliadau a gwylwyr.

Mae Cwnstabl Mike Barnsley, sydd ag 11 mlynedd o wasanaeth gyda Heddlu Dyfed-Powys, wedi’i leoli ar gyrion Paris gyda Doug, ac mae wedi bod yn gweithio gyda’i gymheiriaid o’r DU yn chwilio canolfannau Olympaidd yn ystod y gemau.

Dywedodd: “Mae’n fraint cynrychioli Dyfed-Powys wrth weithio gydag asiantaethau gorfodi’r gyfraith eraill o bob cwr o’r byd yng Ngemau Olympaidd 2024 ym Mharis.”

Mae’r Rhingyll Grace Coburn wedi bod yn gweithio yn Versailles yn ystod y twrnameintiau golff ochr yn ochr â Chwnstabl Sophie Maliphant a Chwnstabl Sophie Webber, a dywedodd bod ymwelwyr wedi synnu gweld swyddogion o Gymru’n gweithio yn y digwyddiad.

“Mae’n rhaid bod ‘Heddlu’ ymysg y chwiliadau mwyaf poblogaidd ar Google ar hyn o bryd gan fod cymaint o bobl wedi cerdded heibio inni, edrych i weld beth yw ei ystyr ar Google, ac yna wedi dod yn ôl gan ryfeddu ein bod ni o Gymru,” meddai.  

“Mae’n brofiad arbennig, ac rydym i gyd yn ddiolchgar iawn i gael y cyfle hwn.”

Ychwanegodd Cwnstabl Sophie Maliphant: "Rydw i wedi cael profiad gwych yn gweithio yn y Gemau Olympaidd gyda dau gydweithiwr o Heddlu Dyfed-Powys. Rydyn ni wedi bod yn ffodus iawn o gael gweithio ochr yn ochr â’r Carabinieri o’r Eidal, Gwarchodlu Sifil Sbaen a’r Gendarmerie, yn plismona a phatrolio’r cwrs golff yn ystod y twrnamaint.

"Rwyf wedi creu atgofion arbennig, a byddaf yn ddiolchgar am byth o gael bod yn rhan o’r tîm plismona rhyngwladol ar gyfer Gemau Olympaidd 2024 ym Mharis.”

Tra’u bod nhw yn Ffrainc, mae’r swyddogion hefyd wedi cael y cyfle i gwrdd â gŵyr pwysig, gyda Chwnstabl Barnsley a’r ci heddlu Doug yn cael eu gwahodd i Lysgenhadaeth Prydain a chwrdd â thrinwyr cŵn eraill o Adran Heddlu Efrog Newydd, a’r Rhingyll Coburn, Cwnstabl Webber a Chwnstabl Maliphant yn cwrdd â chyd-gyfarwyddwr diogelwch rhyngwladol.

Roedd disgwyl i 35,000 o swyddogion heddlu a gendarmes gael eu defnyddio bob dydd yn ystod y gemau, a 45,000 ar gyfer y seremoni agoriadol. Roedd swyddogion o’r DU hefyd yn cynnwys cwnstabliaid heddlu gwirfoddol.  

Adref, mae gwasanaethau heddlu hefyd wedi bod yn gweithio gyda phartneriaid lleol er mwyn helpu i gefnogi digwyddiadau Olympaidd a Pharalympaidd ac ardaloedd cefnogwyr mewn amrediad o leoliadau.