Dyn o Sir Benfro yn euog am droseddau rhyw ar blant

Cafodd dyn 66 oed o Aberdaugleddau, Sir Benfro, ei ddedfrydu i 27 mis yn y carchar yn Llys y Goron Abertawe ddydd Mawrth 13 Awst, 2024.

Cafwyd Paul Chesher o Herbrandston, Aberdaugleddau, yn euog i ddau achos o geisio annog neu ysgogi merch ifanc dan 13 oed i ymgymryd â gweithgarwch rhywiol, ac un achos o geisio cyfathrebu'n rhywiol â phlentyn. Plediodd Chesher yn euog i bob cyhuddiad mewn gwrandawiad yn gynharach yn y flwyddyn.

Cafodd yr ymchwiliad ei arwain gan Heddlu Dyfed Powys a'i gefnogi gan Tarian, sef Uned Troseddau Cyfundrefnol Ranbarthol de Cymru. Derbyniodd Tarian guddwybodaeth bod Chesher yn ymgysylltu â rhywun ar-lein y credid iddi fod yn ferch heb gyrraedd ei harddegau. Cafodd ymchwil ei gynnal ar unwaith, ac arweiniodd hyn at arestio Chesher ynghyd ag archwiliad fforensig o'i ddyfeisiau digidol.

Dywedodd y Ditectif Gwnstabl Paul Kelly, o Heddlu Dyfed Powys: “Mae'r ddedfryd hon a'r ymchwiliad ei hun wedi arddangos y cydweithredu rhagorol sydd i'w gael rhwng asiantaethau'r heddlu. Mae'n anfon neges glir i droseddwyr na chaff unrhyw drosedd yn erbyn plant ei goddef, a byddwn ni fel yr heddlu yn dod o hyd i'r troseddwyr ac yn ceisio cyfiawnder i'r plant a fu'n ymwneud â'r achos.

Dywedodd swyddog achos yr Uned Troseddau Cyfundrefnol Ranbarthol (ROCU) Tarian, y Ditectif Gwnstabl Isaac Gott: “Mae'r Uned yn ymrwymedig i nodi unigolion sydd â diddordeb rhywiol mewn plant, a byddwn yn gweithio'n ddiflino i ddod o hyd iddynt. Yn ychwanegol at y ddedfryd hon, mae Chesher bellach yn destun Gorchymyn Atal Niwed Rhywiol am 10 mlynedd a bydd gofyn iddo gofrestru fel troseddwr rhyw am 10 mlynedd.”