124 o ymosodiadau difrifol cysylltiedig ag alcohol a 1,200 o ddigwyddiadau cam-drin domestig yn cael eu hadrodd wrth yr heddlu yn y cyfnod yn arwain at y Nadolig

Adroddwyd am dros 124 o ymosodiadau a oedd yn gysylltiedig ag alcohol a bron i 1,200 o ddigwyddiadau cam-drin domestig wrth Heddlu Dyfed-Powys ym mis Rhagfyr yn unig y llynedd. 

Mae’r heddlu wedi rhyddhau ei ffigurau diweddaraf wrth iddo baratoi ar gyfer cynnydd yn nifer yr achosion cam-drin domestig ac ymosodiadau difrifol yn y cyfnod yn arwain at y Nadolig.

Mae ymgyrch cyfryngau cymdeithasol wedi’i lansio, sy’n tynnu sylw at effaith ddinistriol y troseddau hyn; gan siarad yn uniongyrchol â’r rhai sy’n byw mewn cartrefi lle mae cam-drin yn digwydd i roi’r grym iddynt godi eu llais; ac atgoffa unrhyw un sy’n poeni am ei ymddygiad ar ôl bod yn yfed ble y gall gael cymorth.

Dywedodd y Ditectif Uwch-arolygydd Wayne Bevan: “Wrth inni agosáu at y Nadolig, yr ydym wedi penderfynu ymhelaethu ar ein negeseuon  o gwmpas ymosodiadau difrifol lle mae alcohol yn ffactor, yn ogystal â cham-drin domestig, oherwydd, yn anffodus, yr ydym yn gweld cynnydd yn nifer y galwadau sy’n ymwneud â’r ddau dros gyfnod y Nadolig.

“I’r rhan fwyaf o bobl, mae’r adeg hon o’r flwyddyn llawn hapusrwydd - amser i ddathlu gyda ffrindiau a theulu - ac mae ein swyddogion yn mwynhau gweld pobl mas yn mwynhau eu hunain. Fodd bynnag, mae ein swyddogion hefyd yn debygol o weld y rhai sy’n mynd trwy amseroedd tywyll - wrth iddynt dorri’r newydd fod anwylyn wedi dioddef ymosodiad ffyrnig ar noson mas, neu wrando ar ddioddefydd cam-drin domestig yn esbonio sut mae rhywun yr oedd yn ymddiried ynddo wedi chwalu ei fywyd.

“Drwy’r ymgyrch hon, gobeithiwn y gallwn gynyddu hyder o ran adrodd am ddigwyddiadau cam-drin domestig, a lleihau nifer yr ymosodiadau difrifol drwy gyfeirio’r rhai sy’n cael trafferth rheoli eu hymddygiad ar ôl bod yn yfed at asiantaethau cymorth.”

Fis Rhagfyr diwethaf, cofnododd Heddlu Dyfed-Powys 1,196 adroddiad am gam-drin domestig wrth i’r heddlu gynnal ymgyrch unwaith y rhagor yn annog pobl a oedd yn poeni am eu hunain neu eraill i godi eu llais.

“Gwelsom gynnydd o ran adroddiadau yn 2022 a 2023 o’u cymharu â’r ddau fis Rhagfyr blaenorol wrth inni wneud ymdrech ddygn i siarad am gam-drin domestig mewn ffordd wahanol i’r arfer,” meddai’r Ditectif Uwch-arolygydd Bevan.

“Arweiniodd hyn at gynnydd yn nifer y ceisiadau am wybodaeth drwy Gyfraith Clare hefyd, sef cyfraith sy’n caniatáu i bobl gael gwybod pa un ai a oes gan eu partner hanes o gam-drin domestig. Byddwn ni’n rhannu’r negeseuon hyn eto i gyrraedd pobl a allai fod angen cymorth.”

Ym mis Rhagfyr, cofnododd Heddlu Dyfed-Powys gyfanswm o 124 ymosodiad a oedd yn gysylltiedig ag alcohol – mae hyn yn cynnwys ymosodiad cyffredin, ymosodiadau a achosodd gwir niwed corfforol ac ymosodiadau a achosodd niwed corfforol difrifol.  

Roedd 56 o’r rhain yn ymosodiadau difrifol (gwir niwed corfforol a niwed corfforol difrifol) lle’r oedd alcohol yn ffactor, a oedd yn ostyngiad o’r 79 yr adroddwyd amdanynt yn 2022.

Dywedodd y Ditectif Uwch-arolygydd Bevan: “Er ein bod ni wedi gweld gostyngiad yn nifer yr ymosodiadau a arweiniodd at anafiadau difrifol fis Rhagfyr diwethaf, roedd y cynnydd yn nifer y digwyddiadau rhwng 2020 a 2022 yn duedd a oedd yn peri pryder, ac yn un yr ydym yn gobeithio rhoi terfyn arni. Yr ydym yn disgwyl gweld mwy o bobl mas yn mwynhau eu hunain gyda’r nos a dros y penwythnos wrth i dymor y Nadolig agosáu, sydd, yn anffodus, yn dueddol o arwain at fwy o adroddiadau am ymosodiadau.

“Ni ellir gwadu bod gan nifer y digwyddiadau treisgar effaith fawr ar adnoddau’r heddlu, ond yn bwysicach, mae pob un o’r ymosodiadau hyn yn effeithio ar fywydau dioddefwyr a’u teuluoedd. Oherwydd hyn, yr ydym yn gofyn i bobl fod yn fwy ymwybodol o’u hymddygiad, gan geisio cymorth os oes angen, a cherdded i ffwrdd os ydynt yn canfod eu hunain mewn sefyllfa o wrthdaro.”

Am ragor o wybodaeth ynglŷn â sut i adrodd am gam-drin domestig, neu ble i gael cymorth, cliciwch yma: https://www.dyfed-powys.police.uk/cy-GB/cyngor/cyngor-a-gwybodaeth/cam-drin-domestig/cam-drin-domestig/

Am ragor o wybodaeth a chymorth ar gyfer ymdrin â cham-drin sylweddau ac alcohol, ac ymddygiad treisgar, cliciwch yma neu yma.