Mam wedi ei dedfrydu i orchymyn ysbyty ar ôl cyfaddef iddi ladd eu mab saith oed

Mae mam wedi ei dedfrydu i orchymyn ysbyty amhenodol am ladd ei mam saith oed “hyfryd a disglair” yn eu cartref.

Cyfaddefodd Papaipit Linse, o Hwlffordd, ddynladdiad ar sail cyfrifoldeb lleiedig pan ymddangosodd yn Llys y Goron Abertawe y mis diwethaf.

Dychwelodd Linse, 43 oed, i’r llys ar gyfer dedfrydu heddiw, lle clywyd bod tri adroddiad seiciatrig wedi eu cyflawni i’w hiechyd meddwl ar adeg marwolaeth Louis. Cafwyd ei bod yn dioddef symptomau sgitsoffrenig a seicotig yn y dyddiau cyn i’r bachgen saith oed gael ei ladd.

Clywodd y llys sut i Heddlu Dyfed Powys dderbyn galwad 999 o gyfeiriad yn Stryd y Farchnad, Hwlffordd, ychydig cyn 10.45am ar ddydd Mercher, Ionawr 10. Linse ei hun oedd y galwr, ac adroddodd bod ei mab wedi marw, a’i bod hithau wedi ei ladd.

Mynychodd swyddogion ar unwaith, a chanfod y bachgen ifanc yn y gwely. Cadarnhawyd ei fod wedi marw yn yr ysbyty ychydig yn ddiweddarach.

Arestiwyd Linse yn y safle, a’i chyhuddo o lofruddiaeth. Honnodd mewn cyfweliadau heddlu nad oedd ganddi gof o’r digwyddiad. Yn dilyn nifer o adroddiadau meddygol ar gais y llys, cafwyd wrth gyflawni’r weithred, ei bod yn dioddef annormalrwydd o ran gweithredu meddyliol a oedd yn debygol o fod wedi amharu ar ei gallu i ffurfio barn resymol ac arfer hunanreolaeth.

Derbyniwyd ple euog o ddynladdiad gyda chyfrifoldeb lleiedig gan y llys, a gorchmynnwyd hi i gyflawni gorchymyn ysbyty amhenodol. Bydd ei rhyddhad, os ystyrir byth fod hynny’n briodol yn cael ei benderfynu gan seiciatrydd.

Dywedodd yr uwch swyddog ymchwilio, y Ditectif Brif Arolygydd Gary Williams: “Y mae hwn yn achos ofnadwy o drist a thrasig, ac mae ein meddyliau’n parhau’n ddwys gyda phob un a oedd yn adnabod ac yn caru Louis.

“Rydym wedi gweithio’n agos gyda Gwasanaeth Erlyn y Goron ac arbenigwyr iechyd meddwl annibynnol a ddaeth i’r casgliad fod Linse yn dioddef sgitsoffrenia paranoiaidd pan laddodd ei mab.

“Hoffwn ddiolch i’r tîm o swyddogion a staff yr heddlu a gyfrannodd drwy gydol y 11 mis diwethaf am eu diwydrwydd, eu proffesiynoldeb a’u gofal yn ystod yr achos emosiynol hwn, ac am eu hymdrechion wrth sicrhau bod ymchwiliad llawn a thrylwyr wedi ei gyflawni.

Dywedodd y barnwr fod marwolaeth Louis “yn anhraethol o drasig” ac “yn annioddefol i lawer o bobl” gan ychwanegu ei fod yn gobeithio y byddai’r bobl a oedd yn ei adnabod yn deall y ddedfryd a osodwyd.