Swyddogion mewn dillad cyffredin i weithredu fel ‘timoedd aflonyddu’ yn ystod nosweithiau mas

Bydd swyddogion heddlu lifrog a mewn dillad cyffredin yn gweithredu fel timoedd aflonyddu er mwyn atal troseddau rhywiol a thrais yn erbyn menywod yn ystod nosweithiau mas yn y cyfnod yn arwain at y Nadolig.

Bydd prosiect peilot sy’n cael ei gynnal gan Heddlu Dyfed-Powys yn gweld swyddogion mewn dillad cyffredin â hyfforddiant arbenigol yn gweithredu fel gwylwyr yn ystod nosweithiau prysur, gan nodi pobl sy’n ymddangos fel be baent yn cyflwyno perygl i eraill drwy arddangos ymddygiad rhywiol helwriaethol. Bydd y pryderon hyn yn cael eu hadrodd wrth swyddogion heddlu lifrog, a fydd yn camu i mewn er mwyn aflonyddu ar ymddygiad troseddol posibl cyn iddo ddigwydd.

Enw’r cynllun yw Prosiect Vigilant, ac mae’n cael ei dreialu dros penwythnos ym mis Rhagfyr â’r nod o’i gyflwyno ledled yr ardal heddlu yn y flwyddyn newydd. Cyn y lansiad, bydd 12 swyddog o’r tîm plismona rhagweithiol yn derbyn hyfforddiant arsylwi ymddygiadol arbenigol gan gydweithwyr o Heddlu Dyffryn Tafwys i wella eu sgiliau mewn rheoli risg ac annog rhagweithgarwch o ran nodi ymddygiad helwriaethol.

Dywedodd y Prif Arolygydd Dominic Jones: “Mae hwn yn brosiect newydd cyffrous i Heddlu Dyfed-Powys, ac yn un yr ydym yn edrych ymlaen at ei weithredu. Rydyn ni’n hyderus y bydd Prosiect Vigilant yn cael effaith fawr ar helpu i sicrhau a diogelu menywod yn ystod yr economi nos.

“Dylai menywod deimlo’n ddiogel ar noson allan, ac ni ddylent deimlo’r angen i newid eu hymddygiad er mwyn aros yn ddiogel. Drwy gadw llygad allan am ysglyfaethwyr posibl, yn y pen draw, byddwn ni’n newid ymddygiadau’r rhai a allai achosi niwed, a gwneud ein cymunedau’n fwy diogel i bawb.

“Tra bod gan Prosiect Vigilant y nod penodol o helpu i sicrhau a diogelu menywod yn ystod yr economi nos, disgwyliwn iddo gael canlyniad cyffredinol o atal pob math o droseddolrwydd.

“Mae tystiolaeth i ddangos bod troseddwyr wedi’u gwasgaru i leoliadau eraill mewn achosion lle mae heddluoedd wedi anfon mwy o swyddogion lifrog i fannau problemus. Yr allwedd fan hyn yw defnyddio swyddogion mewn dillad cyffredin i nodi’r ymddygiad sy’n achosi pryder a rhoi gwybod i’w cydweithwyr, sy’n medru camu i mewn, am unigolion.

“Dyma un o sawl enghraifft o blismona ataliol a ddefnyddir gan Heddlu Dyfed-Powys i helpu i nodi gweithgarwch troseddol posibl ac ymyrryd cyn i droseddu ddigwydd.”

O dan Brosiect Vigilant, bydd swyddogion yn cael eu hanfon i batrolio ardaloedd sy’n arbennig o brysur gyda’r nos i gadw llygad allan am ymddygiad helwriaethol posibl tuag at fenywod. Bydd swyddogion lifrog yn mynd at unrhyw un sy’n dod i’w sylw fel risg posibl ac yn asesu’r sefyllfa, gan gymryd camau priodol os oes angen.  

Byddant yn cael eu lleoli yn seiliedig ar gudd-wybodaeth er mwyn sicrhau bod swyddogion yn y lle iawn ar yr amser iawn.

Mae Swyddfa Comisiynydd yr Heddlu a Throseddu wedi ariannu’r cynllun peilot o dan y Ddyletswydd Trais Difrifol. Dywedodd CHTh Dafydd Llywelyn: “Fel Comisiynydd Heddlu a Throseddu, rwyf wedi ymrwymo i sicrhau diogelwch menywod yn ein cymunedau, yn arbennig yn ystod cyfnodau prysur gyda’r nos.

“Mae Prosiect Vigilant yn gam pwysig tuag at blismona rhagweithiol ac ataliol, gan anelu i nodi ymddygiad helwriaethol ac aflonyddu arno cyn y gall unrhyw niwed ddigwydd.

“Mae’r fenter hon nid yn unig yn helpu i warchod unigolion, ond mae hefyd yn atgyfnerthu ein hymrwymiad tuag at greu mannau cyhoeddus mwy diogel ledled ardal Dyfed-Powys.

“Mae’n dda iawn gennyf gefnogi’r cynllun peilot hwn, ac edrychaf ymlaen at ei effaith ar ein cymuned.”