Mae swyddog Heddlu Dyfed-Powys wedi’i gyhuddo o ymosodiad rhywiol drwy dreiddio

Mae swyddog Heddlu Dyfed-Powys wedi’i gyhuddo o ymosodiad rhywiol drwy dreiddio.

Mae’r Ditectif Gwnstabl Sam Garside, a oedd wedi’i leoli yn rhanbarth Ceredigion, wedi’i wahardd o’i ddyletswyddau ers mis Gorffennaf 2023 pan adroddwyd ei fod wedi cyflawni trosedd pan nad oedd ar ddyletswydd ym mis Rhagfyr 2021.

Bydd y dyn 30 oed yn ymddangos yn Llys Ynadon Abertawe ar 6 Mawrth 2024.

Dywedodd yr Uwch Swyddog Ymchwilio Huw Davies: "Mae hwn yn honiad difrifol, ac rwy’n cydnabod y bydd yn achosi pryder ymysg ein cymunedau.

"Hoffwn sicrhau bod camau gweithredu cyflym wedi’u cymryd pan wnaed yr honiad, ac rydym yn awr yn disgwyl canlyniad y broses cyfiawnder troseddol.

"Mae camau cyfreithiol ar droed yn awr, ac mae’n bwysig osgoi sylwadau pellach tra bod y broses hon yn mynd rhagddi."