Carchar i dwyllwr a wnaeth ddwyn cannoedd o filoedd oddi ar ei ffrindiau

Mae dyn ‘cwbl anonest’ wedi ei garcharu ar ôl honni bod yn gynghorydd ariannol a thwyllo’i ffrindiau o gannoedd o filoedd o bunnoedd.

Darbwyllodd Darryl Evans, o Green Court Crescent yn Ninbych-y-pysgod ei ffrindiau a phobl eraill roedd yn eu hadnabod i wneud taliadau uchel eu gwerth y dwedodd y byddai’n eu rhoi mewn cynlluniau buddsoddi ar eu rhan.

Mewn gwirionedd, roedd allan o waith ac yn cyllido ei ffordd o fyw ei hun.

Yn dilyn ymchwiliad trwyadl gan Dîm Trosedd Economaidd Heddlu Dyfed Powys cafodd yr unigolyn 62 oed ei gyhuddo o 26 achos o dwyll, ac un o ladrad.

Y mae nawr wedi ei garcharu am wyth mlynedd.

Meddai rheolwr y Tîm Trosedd Economaidd, Paul Callard: “Roedd yr hyn a wnaeth Evans yn torri ymddiriedaeth ei ffrindiau mewn ffordd ddifrifol. Fe ddwedodd gelwydd am ei broffesiwn er mwyn ennill eu parch a’u hyder, cyn mynd a’u harian ar y cytundeb y byddai’n cael ei fuddsoddi er eu budd.

“Pan roeddent yn meddwl y byddent yn elwa o’r buddsoddiad hwn, roedd Evans yn cadw’r arian ar ei gyfer ei hun – er yn dilyn nifer o ymchwiliadau ariannol does dim tystiolaeth i ddangos ar beth roedd yn gwario’r arian.”

Daeth ymddygiad troseddol Evans i’r golwg yn 2018, pan fethodd ei ddioddefwyr â derbyn unrhyw arian o’u ‘buddsoddiadau’ a chodwyd eu hamheuon.

Wrth i ymholiadau’r heddlu ddatblygu, sefydlwyd bod nifer o bobl wedi eu heffeithio gan ei gynllun anonest, ac arestiwyd Evans ar amheuaeth o dwyll.

Yn dilyn treial hir yn Rhagfyr 2023, cafwyd ef yn euog o 26 achos o dwyll, ac un o ladrad, gyda EAF Barnwr Thomas yn ei ddisgrifio fel ‘un o’r dynion mwyaf anonest’ yr oedd erioed wedi ei gyfarfod.

Dedfrydwyd ef i wyth mlynedd o garchar am achosi colled o £377,000 ar Ionawr 5, 2024.

Canmolodd EAF Barnwr Thomas waith y Tîm Trosedd Economaidd, gan roi cymeradwyaeth uchel i swyddog yr achos Dawn Jones yn benodol am ansawdd ei hymchwiliad.

Dwedodd Mr Callard: “Roedd hwn yn ymchwiliad cymhleth, wedi ei waethygu gan anawsterau wrth weithio gyda nifer o achwynwyr, a’r oedi a achoswyd gan y pandemig Covid-19.

“Fodd bynnag, roedd ein tîm wedi ei ymrwymo i gael cyfiawnder i’r rhai hynny oedd yn gysylltiedig â hyn, ac mae hwn yn ganlyniad rhagorol i gloi’r ymchwiliad.

“Hoffwn adleisio cymeradwyaeth y barnwr o waith Dawn – roedd ei hymdrech ar bob cam yn eithriadol, ac mae hynny wedi sicrhau bod holl ehangder gweithredoedd Evans wedi dod i’r golwg.”