Mynd i’r afael â beicwyr allffordd anghyfreithlon yn ardal Llanelli

Mae Heddlu Dyfed-Powys yn mynd i’r afael â beicwyr allffordd anghyfreithlon yn ardal Llanelli yn dilyn nifer o gwynion am feicwyr allffordd yn reidio’n anghyfreithlon a di-hid ar lwybrau troed. Mae ardaloedd yr effeithir arnynt yn cynnwys chwarel Penyfan, Llynnoedd Delta, Parc Dŵr Sandy, Trimsaran (ger y cae ras), Felinfoel, a Llwybr Arfordir y Mileniwm.

Gall beicio allffordd achosi difrod helaeth i dir, bywyd gwyllt a chynefinoedd naturiol, a gall defnyddio cerbydau allffordd yn wrthgymdeithasol effeithio’n ehangach ar ein cymdogaethau a dychryn preswylwyr.

Nid yw wedi’i gyfyngu i niwsans sŵn yn unig; gall gyflwyno peryglon sylweddol i fodurwyr eraill a cherddwyr.

Mae beiciau allffordd yn cynnwys amrediad o gerbydau, megis beiciau cwad a beiciau modur, gan gynnwys beiciau sgrialu a beiciau mini.

• O dan Adran 59 Deddf Diwygio’r Heddlu 2002, gall swyddogion atafaelu cerbydau sy’n cael eu defnyddio’n anghyfreithlon, gan gynnwys defnydd allffordd wedi’i wahardd.
• Hyd yn oed os oes gan rywun ganiatâd i reidio beic cwad ar dir, os canfyddir eu bod yn reidio’n “beryglus” neu’n “ddi-hid” (yn ôl diffiniad Deddf Traffig Ffyrdd 1991), byddent yn euog o drosedd hyd yn oed pan nad ydynt yn gyrru ar ffordd.
• Byddai unigolion sy’n reidio beic cwad ar lwybr troed, llwybr ceffyl neu lwybr ceffyl cyfyngedig yn euog o drosedd o dan Ddeddf Cefn Gwlad a Hawliau Tramwy 2000.

Mae ein swyddogion Troseddau Gwledig yn gweithio gyda thimoedd plismona bro, Adnoddau Naturiol Cymru, GanBwyll a’r awdurdod lleol i addysgu ac ymgysylltu â phreswylwyr ac ymwelwyr am effaith reidio allffordd gwrthgymdeithasol.

Dywedodd Robert Evans, Arolygydd Llanelli:

“Gwn fod beiciau allffordd yn achosi niwsans ac yn cyfrannu at ymddygiad gwrthgymdeithasol ar draws ein cymunedau, ac rydyn ni fel heddlu wedi ymrwymo i fynd i’r afael â’r rhai sy’n achosi problemau.

Hoffem atgoffa aelodau o’r cyhoedd – y rhai sy’n byw yn yr ardaloedd hyn, ac sy’n teithio yma – na fydd ymddygiad gwrthgymdeithasol, gollwng sbwriel, a defnyddio cerbydau allffordd mewn modd di-hid neu anghyfreithlon yn cael ei oddef.

Rydyn ni eisiau i bawb fwynhau’r amgylchedd hardd nas difethwyd yn ddiogel, cyfrifol a chyfreithlon, ac o ganlyniad, bydd ein swyddogion yn ymateb yn gadarn i unrhyw adroddiadau am ymddygiad anghyfreithlon neu wrthgymdeithasol sy’n difrodi’r amgylchedd neu’n bygwth diogelwch neu fwynhad eraill.”

Ychwanegodd y Rhingyll Plismona Bro Ian Roach:

“Mae’r gudd-wybodaeth a’r adroddiadau a ddarperir gennych chi, ein cymunedau, yn ein galluogi i ddeall ble mae’r ardaloedd problemus, yn ogystal â phwy sy’n gyfrifol.  

Ni fydd yr ymddygiad hwn yn cael ei oddef, ac rydym yn gofyn i aelodau o’r cyhoedd barhau i’n cefnogi i fynd i’r afael â’r mater hwn drwy roi gwybodaeth inni’n uniongyrchol am feiciau allffordd yn eu hardal.”

Os ydych chi’n gwybod pwy yw’r unigolion hyn, rhowch wybod i ni ar:

Cysyllwtch ar lein, drwy anfon e-bost at [email protected], neu drwy alw 101.

Fel arall, cysylltwch â’r elusen annibynnol Crimestoppers yn ddienw drwy alw 0800 555111, neu drwy alw heibio i crimestoppers-uk.org.