Ychwanegu cyn swyddog heddlu at restr y Coleg Plismona o swyddogion sydd wedi eu gwahardd

Ar 3 Mehefin 2024, cynhaliwyd gwrandawiad camymddwyn carlam ym Mhencadlys Heddlu Dyfed-Powys mewn perthynas â chyn Gwnstabl Heddlu, Christian Stobbs, a arferai weithio yn Sir Gaerfyrddin. Ymddiswyddodd Mr Stobbs o’r heddlu pan oedd yn destun ymchwiliad am droseddau camddefnyddio cyfrifiaduron. Cyfaddefodd Mr Stobbs i’r troseddau a derbyniodd rybudd. 

Cychwynnwyd achos cyn-swyddog ar y rhagosodiad pe bai Mr Stobbs yn dal i wasanaethu yna byddai’r ymddygiad dan sylw wedi cyfiawnhau ei ddiswyddo o’r Heddlu a’i ychwanegu at restr y Coleg Plismona o swyddogion sydd wedi eu gwahardd, a fyddai’n ei atal rhag mynd yn ôl i wasanaeth yr heddlu neu wasanaeth gorfodi’r gyfraith penodedig.

Cadeiriodd y Prif Gwnstabl Dr Richard Lewis y gwrandawiad carlam, ac yn absenoldeb Mr Stobbs, penderfynodd fod ymddygiad y cyn-swyddog yn gyfystyr â chamymddwyn difrifol, pe bai’n dal i wasanaethu y byddai wedi cael ei ddiswyddo o’r Heddlu, ac y dylai nawr gael ei ychwanegu at restr y Coleg Plismona o swyddogion sydd wedi eu gwahardd.

Dywedodd yr Uwch-arolygydd Huw Davies o Adran Safonau Proffesiynol Heddlu Dyfed-Powys:

"Mae Heddlu Dyfed-Powys yn disgwyl y safonau uchaf o onestrwydd ac unplygrwydd gan bob swyddog, a bydd unrhyw doriadau honedig o’r Safonau Ymddygiad Proffesiynol yn cael eu trin yn briodol."