Dedfryd Unfryd yn Achos Ymosodiad Rhywiol Ceredigion

Mae dyn o Geredigion wedi ei euogfarnu i dair blynedd a chwe mis o garchar am ymosod yn rhywiol ar fenyw yn ei gwely ei hun wedi i’r rheithgor ddychwelyd dedfryd euog unfryd.

Dedfrydwyd Suroj Bk, 27 oed o Langrannog, yr wythnos hon yn dilyn treial wythnos o hyd yn Llys y Goron Abertawe (ar ddydd Mercher 1 Mai 2024).

Ar 7 Hydref 2023, derbyniodd Heddlu Dyfed Powys adroddiad bod Bk wedi mynd i mewn i dŷ’r dioddefydd ac ymosod yn rhywiol arni wrth iddi orwedd yn ei gwely.

Pan sylweddolodd y dioddefydd beth oedd yn digwydd, gwthiodd Bk o’i gwely a galw’r heddlu.

Yn syth ar ôl derbyn yr adroddiad, aeth swyddogion yn gyflym i dŷ’r dioddefydd a chynnal chwiliad manwl o’r ardal amgylchynol gan ddefnyddio cŵn yr heddlu a swyddogion safleoedd trosedd.

Arweiniodd tystiolaeth a gasglwyd o’r safle, ynghyd ag ymholiadau lleol helaeth, swyddogion i arestio Suroj Bk y diwrnod canlynol (8 Hydref).

Tra roedd Bk yn y ddalfa, gweithiodd swyddogion ditectif, ymchwilwyr safleoedd trosedd, a swyddogion fforensig digidol yn ddiflino i ddadorchuddio’r dystiolaeth a wnaeth yn y pen draw osod Suroj Bk yn y safle.

Ar ôl clywed y dystiolaeth, cymerodd y rheithgor llai na dwy awr i gytuno’n unfryd ar ddedfryd euog.

Mae’r ditectif oedd yn gyfrifol am yr achos wedi canmol y dioddefydd am eu ‘dewrder aruthrol’ yn adrodd yr ymosodiad i’r heddlu.

“Mae digwyddiadau o’r natur hwn yn anghyffredin iawn o fewn Ceredigion, diolch byth, a hoffwn sicrhau’r gymuned mai digwyddiad unigol oedd hwn, a bod adnabod ac arestio’r unigolyn dan amheuaeth wedi ei gyflawni’n gyflym ac yn effeithiol,” dywedodd y Ditectif Arolygydd Sam Gregory. 

“Dangosodd y dioddefydd yn yr achos hwn ddewrder aruthrol wrth adrodd i’r heddlu, ac er nad oedd yr ymchwiliad hwn o natur syml, drwy arbenigrwydd a dycnwch swyddogion fforensig, yn cydweithio gyda’r tîm ymchwilio, a’r dioddefydd, yr arweiniwyd at yr erlyniad llwyddiannus hwn.

“Rwyf yn gobeithio bod y ddedfryd a roddwyd i Suroj Bk yn anfon neges glir a chadarn bod Heddlu Dyfed Powys yn cymryd adroddiadau o ymosodiadau rhywiol o ddifri.

“Byddwn yn gwrando arnoch chi, a byddwn yn gweithio’n ddiflino i gael cyfiawnder.”

Ar ddydd Mercher, 1 Mai 2024, dedfrydwyd Suroj Bk i dair blynedd a chwe mis o garchar a gorchymyn atal pum mlynedd, a bydd ar y gofrestr troseddwyr rhyw am oes.

Os ydych wedi dioddef trosedd fel hon, adroddwch amdani i Heddlu Dyfed Powys naill ai drwy neges uniongyrchol ar gyfryngau cymdeithasol, ar-lein ar https://www.dyfed-powys.police.uk/cy-GB/riportio treisio-ymosod-rhywiol-troseddau-rhywiol-eraill, drwy anfon e-bost at [email protected], neu drwy ffonio 101.

Mewn argyfwng, galwch 999.

Os ydych yn fyddar, yn drwm eich clyw, neu os oes gennych amhariad lleferydd anfonwch neges destun at y rhif difrys ar 07811 311 908. Fel arall, cysylltwch â’r elusen annibynnol Crimestoppers Cymru’n ddienw drwy ffonio 0800 555 111, neu drwy fynd at crimestoppers-uk.org