Uned Forol Heddlu Dyfed Powys yn Cefnogi Wythnos Ddiogelwch Ryngwladol

Mae Uned Forol Ymgyrch Ddiogelu Heddlu Dyfed Powys wedi helpu chwarae rôl ganolog wrth gefnogi Wythnos Rheoli Diogelwch Morol a drefnwyd gan y corff gorfodi cyfraith morol Ewropeaidd AQUAPOL.

Daeth yr wythnos genedlaethol o weithredu ag asiantaethau gorfodi cyfraith y DU a phartneriaid ynghyd i ddwysáu gweithgarwch diogelwch morol ar draws y wlad.

Yn ystod yr ymgyrch wythnos o hyd, o ddydd Llun, 18 Tachwedd i ddydd Sul, 24 Tachwedd, aeth swyddogion ar fwrdd 11 llong yn Nyfrffordd y Ddau Gleddau.

Fel rhan o’r gwiriadau hyn, archwiliwyd dogfennaeth y criw, a chasglwyd cudd-wybodaeth i’w gyflwyno i’r Gyd-ganolfan Ddiogelwch Morol a’r Ganolfan Asesu Forwrol Genedlaethol - Plismona Gwrthderfysgaeth.

Prif genhadaeth Wythnos Reoli Diogelwch Morol AQUAPOL yw ceisio helpu cydgysylltu sgrinio, asesu a rheoli symudiad llongau ym mhorthladdoedd a dyfroedd y DU a chyflawni gweithrediadau gweladwy ar ffiniau morol rhyngwladol er mwyn sicrhau’r cyhoedd a chymunedau porthladdoedd.

Ei amcan hefyd yw atal unigolion sy’n ceisio defnyddio llwybrau milwrol ar gyfer gweithgarwch troseddol neu ddibenion ideolegol, ac mae’n helpu codi ymwybyddiaeth y cyhoedd o fentrau diogelwch morol allweddol fel Portsafe a Kraken.

💬 Dywedodd y Rhingyll Jason Richards, o Uned Forol Heddlu Dyfed Powys: “Mae wythnos weithredu AQUAPOL yn amlygu pwysigrwydd ymdrechion cydweithredol o fewn diogelwch morol.

“Mae ein gwaith yn Nyfrffordd y Ddau Gleddau’n sicrhau diogelwch isadeiledd ac yn dangos ein hymrwymiad i gadw dyfroedd y DU yn ddiogel.”

Ar draws y DU aethpwyd ar fwrdd cyfanswm o 50 o longau yn ystod yr ymgyrch, gan gyfrannu at lwyddiant cyffredinol wythnos AQUAPOL, lle archwiliwyd 178 llong yn rhyngwladol.

Mae’r fenter hon yn pwysleisio ymrwymiad parhaus Heddlu Dyfed Powys i gefnogi ymdrechion cenedlaethol a rhyngwladol i ymladd trosedd morol a diogelu asedau arfordirol hanfodol.