CAM-DRIN DOMESTIG: Tîm ymateb fideo’n rhoi mwy o ddewis i ddioddefwyr o ran y modd maen nhw’n siarad â’r heddlu

Mae dioddefwyr cam-drin domestig yn cael mwy o ddewis o ran y modd maen nhw’n cyfathrebu â’r heddlu diolch i dîm ymateb fideo newydd yn Nyfed-Powys.

Mae’r Uned Ymateb Fideo i Gam-drin Domestig yn galluogi dioddefwyr i ddewis pa un ai a ydynt eisiau derbyn galwad fideo wrth swyddog heddlu pan maen nhw’n adrodd am ddigwyddiad domestig difrys. Mae hyn yn rhoi mwy o hyblygrwydd iddynt o ran ble a phryd maen nhw’n siarad â swyddog am yr hyn sydd wedi digwydd, ac yn galluogi swyddogion i gael gwybodaeth a thystiolaeth yn gynt.

Lle mae digwyddiad yn cael ei raddio fel digwyddiad perygl uwch, bydd swyddogion yn mynd i leoliad y digwyddiad yn syth fel mater o drefn.

Dywedodd y Prif Arolygydd Gerallt Jones: “Mae’r Uned Ymateb Fideo i Gam-drin Domestig yn galluogi dioddefwyr troseddau domestig nad ydynt yn cael eu hystyried yn ddigwyddiadau perygl uwch i dderbyn ymateb rheng flaen pan maen nhw ei angen. Yn y gorffennol, byddai’r digwyddiad yn cael ei bennu i swyddog lleol er mwyn iddo gysylltu â’r dioddefydd, ac o ganlyniad i’r galw mawr ar ein hadnoddau, yn anffodus, roedd rhai dioddefwyr yn aros rhy hir i siarad â rhywun.

“Mae ein gwasanaeth ymateb fideo nawr yn ein galluogi i nodi risg a chynnal asesiad o gyfleoedd tystiolaethol yn gynt, a dechrau rhoi cymorth mewn grym ar gyfer pobl sy’n byw gyda cham-drin domestig.  

“Nid yn unig hynny, ond ar gyfer nifer o ddioddefwyr, bu’r gallu i gyfathrebu â swyddogion o bell yn fantais gan ei fod yn fwy disylw na chael swyddog yn eu cartref ac yn llai arswydus na gorfod ymweld â gorsaf heddlu. Gallai hyn fod wedi bod yn rhwystr rhag adrodd yn y gorffennol.”

Gyda’r Uned Ymateb Fideo i Gam-drin Domestig mewn grym, mae dal angen i ddioddefydd adrodd am ddigwyddiad yn y ffordd arferol – drwy alw 999 neu 101, adrodd ar-lein neu drwy neges uniongyrchol ar gyfryngau cymdeithasol. Bydd y triniwr galwadau’n brysbennu’r digwyddiad ac yn nodi pa un ai a yw’n addas ar gyfer ymateb fideo. Yna, bydd y dioddefydd yn penderfynu pa un ai a yw am dderbyn galwad fideo ai peidio, ac os yw’n cydsynio, anfonir ei fanylion at swyddog o’r Uned Ymateb Fideo i Gam-drin Domestig. Mae’r rhan fwyaf o ddioddefwyr nawr yn derbyn galwad yn ôl o fewn 24 awr, a gall drefnu apwyntiad ar gyfer trafod manylion llawn y digwyddiad.

Pan ystyrir fod gormod o risg yn gysylltiedig â digwyddiad, neu mae’r digwyddiad yn mynd rhagddo, bydd yn cael ei drin gan swyddogion rheng flaen.