Carcharu dyn am daflu asid at ddioddefydd, gan losgi ei wyneb a’i lygaid

Mae dyn a daflodd sylwedd cyrydol dros ddyn arall, a allai achosi iddo golli ei olwg, wedi ei garcharu am 19 mlynedd.

Achosodd Jivan Dean, o Landeilo, anafiadau a newidiodd bywyd ei ddioddefydd yn Nyffryn Tipi, ger Llandeilo, ar 14 Awst 2024.

Arestiwyd y dyn 24 oed ar ôl i swyddogion Heddlu Dyfed-Powys chwilio amdano yn dilyn y digwyddiad, wedi iddo adael y lleoliad, gan adael y dioddefydd mewn poen difrifol.

Cafodd yr heddlu wybod am yr ymosodiad gan aelod o staff yn Ysbyty Glangwili, lle’r oedd y dioddefydd yn cael ei drin am sawl anaf i’w ben, wyneb, llygaid ac ysgwyddau.

Darganfu ei fod wedi dioddef llosgiadau cemegol, ac y gallai’r difrod i’w lygaid fod yn barhaol.

Pan siaradodd swyddogion ag ef, dywedodd ei fod wedi bod yng nghartref ffrind pan ddaeth dyn allan o’r gegin ac arllwys sylwedd ‘poeth iawn’ drosto. Gwnaeth yr hylif iddo deimlo ar unwaith fel pe bai'n llosgi.

Dywedodd mai’r drwgdybyn oedd Jivan Dean, ac anfonwyd timoedd o swyddogion heddlu i ddod o hyd iddo.

Arestiwyd Dean ar 17 Awst, a chafodd ei gyhuddo o ymosod gan achosi niwed corfforol difrifol a thaflu sylwedd cyrydol â bwriad o anafu, llosgi neu anffurfio.

Cyfaddefodd i’r troseddau ac fe’i dedfrydwyd i 19 mlynedd o garchar pan ymddangosodd yn Llys y Goron Abertawe ddydd Gwener 25 Hydref.

Dywedodd y Ditectif Brif Arolygydd Gary Williams o Heddlu Dyfed-Powys: “Roedd hon yn weithred dreisgar arswydus, a gyflawnwyd gyda’r bwriad o achosi niwed sylweddol.

“Nid oedd staff yr ysbyty erioed wedi gweld y fath losgiadau cemegol, ac mae’n debyg y bydd golwg y dioddefydd yn cael ei effeithio am weddill ei fywyd.  

“Yn ffodus, mae ymosodiadau o’r fath yn brin iawn, fodd bynnag, cydnabyddwn nad yw hyn yn tynnu oddi wrth ddifrifoldeb y digwyddiad hwn.  

“Gallwn ond gobeithio bod y ffaith bod ei ymosodwr wedi’i ddwyn i gyfiawnder wedi dod â rhywfaint o gysur i’r dioddefydd, a dymunwn yn dda iddo yn ei adferiad.”