Carcharu dyn o Aberdaugleddau am 20 mlynedd am droseddau rhywiol hanesyddol yn erbyn plant

Mae dyn o Aberdaugleddau wedi’i garcharu am 20 mlynedd ar ôl cyfaddef i droseddau hanesyddol yn erbyn plant dros gyfnod o 42 mlynedd.

Clywodd Llys y Goron Abertawe sut yr oedd Alan Roberts wedi cyflawni 23 trosedd yn erbyn merched ifainc rhwng 1976 a 2018, gyda phob un o’i chwe dioddefydd yn credu eu bod nhw ar ben eu hunain o ran dioddef ei gam-drin.

Plediodd y dyn 74 oed o Heol Picton, Hakin, yn euog i 17 achos o ymosod yn anweddus ar ferch o dan 14 oed, pedwar achos o ymosodiad anweddus difrifol ar ferch o dan 14 oed, a dau achos o ymosod ar ferch o dan 14 oed drwy gyffwrdd.

Dywedodd y Ditectif Gwnstabl Paul Kelly, un o swyddogion Heddlu Dyfed-Powys: “Roedd troseddu’r diffynnydd dros gyfnod o 42 mlynedd, sy’n gyfnod o gam-drin arswydus, ymestynnol, ac mae ei ddedfryd o 20 mlynedd yn adlewyrchu hyn.

“Hoffwn ddiolch i’r chwe dioddefydd dewr iawn yn yr achos hwn. Mae pob un ohonynt wedi dangos cryfder cymeriad aruthrol, i ddechrau drwy adrodd am y cam-drin, a hefyd wrth weithio gyda ni drwy gydol yr ymchwiliad.

“Mae’r achos hwn yn atgoffa pobl y gellir cyflwyno cyfiawnder flynyddoedd lawer ar ôl i’r cam-drin ddigwydd.

“Rwy’n gobeithio bod y dioddefwyr a’r teuluoedd sydd wedi’u heffeithio gan weithredoedd Alan Robert yn gallu ceisio symud ymlaen â’u bywydau nawr, a bod ei ddedfryd yn rhoi rhywfaint o gysur iddynt.”