Cyfaddefodd dyn o Geredigion ei fod wedi ceisio llofruddio baban

Cyfaddefodd dyn o Geredigion ei fod wedi ceisio llofruddio baban pan ymddangosodd yn Llys y Goron Abertawe ddoe, dydd Iau 10 Ebrill.

Galwyd swyddogion i gyfeiriad yn y Ferwig, Ceredigion, ychydig cyn 10.15 o’r gloch nos Fercher 15 Ionawr yn dilyn adroddiad am bryder ynghylch lles baban.

Aed â’r plentyn ifanc i’r ysbyty mewn cyflwr difrifol yn dilyn y digwyddiad. Mae’r plentyn mewn cyflwr sefydlog yn awr ac yn parhau i dderbyn triniaeth.

Cafodd Rhydian Jamieson, 28 oed, o Gwm-cou, Castellnewydd Emlyn, ei gyhuddo wedi hynny o ymgais i lofruddio, ac mae wedi pledio’n euog i’r drosedd yn awr o flaen y llys.

Bydd yn cael ei ddedfrydu yn Llys y Goron Abertawe ddydd Mawrth 27 Mai 2025.