Prif Gwnstabl Heddlu Dyfed-Powys i Ymddeol

Mae Prif Gwnstabl y gwasanaeth heddlu sy’n gwasanaethu Sir Gaerfyrddin, Ceredigion, Sir Benfro a Phowys wedi cyhoeddi ei fod yn ymddeol o blismona ar ôl gyrfa 25 mlynedd.

Dywedodd y Prif Gwnstabl Dr Richard Lewis: “Fel rhywun a gafodd ei fagu yng ngorllewin Cymru ac sydd wedi gweithio yn y pedair sir, arwain Heddlu Dyfed-Powys fu braint broffesiynol fwyaf fy mywyd.

“Does gen i ddim byd ond atgofion melys o weithio i’r heddlu arbennig hwn, ac mewn plismona. Bu’n fraint gweithio ochr yn ochr â’r CHTh Dafydd Llywelyn, sy’n arweinydd gwirioneddol ac yn ffigwr o bwys yn genedlaethol yng Nghymru sydd wedi buddsoddi cymaint yn natblygiad Dyfed-Powys a diogelwch ei gymunedau.

“Mae gennyf bob ffydd y bydd pwy bynnag sy’n cael ei benodi fel y Prif Gwnstabl nesaf yn parhau â llwybr cadarnhaol yr heddlu, sydd wedi’n harwain i leihau trosedd 18% dros y 12 mis diwethaf – sef y gostyngiad mwyaf yn nifer y troseddau mewn unrhyw le yng Nghymru a Lloegr o bell ffordd.”

Yn dilyn cyhoeddiad y Prif Gwnstabl, cyhoeddodd Dafydd Llywelyn, Comisiynydd yr Heddlu a Throseddu, y sylwadau canlynol: “Hoffwn fynegi fy niolch diffuant i’r Prif Gwnstabl Dr Richard Lewis am ei wasanaeth a’i ymrwymiad i Heddlu Dyfed-Powys. 

“Bu ei arweinyddiaeth yn allweddol wrth dywys yr heddlu drwy gyfnod o newid sylweddol dros y tair blynedd diwethaf, gan sicrhau ein bod ni’n parhau i ddarparu gwasanaeth plismona effeithiol ac effeithlon i’r cymunedau yr ydym yn eu gwasanaethu.

“Yn ystod ei gyfnod yn y swydd, mae Dr Richard Lewis wedi goruchwylio sawl rhaglen newid fel rhan o adolygiad o’r Heddlu, gan gyflwyno newidiadau hanfodol sydd wedi sicrhau arbedion o £10 miliwn. Bu ei arweinyddiaeth strategol yn allweddol wrth foderneiddio’r heddlu, gan sicrhau ein bod ni mewn sefyllfa well i fodloni gofynion plismona modern.  

“Y mae hefyd wedi goruchwylio cyflwyno system rheoli cofnodion newydd, sydd wedi gwella’r ffordd yr ydym yn cofnodi ac yn rheoli data trosedd. Roedd hwn yn gam hollbwysig mewn ymateb i achos pryder carlam AHGTAEF ar unplygrwydd data trosedd, gan sicrhau mwy o gywirdeb ac atebolrwydd yn ein harferion cofnodi troseddau.

“Yn yr wythnosau a ddaw, byddaf yn dechrau’r broses o benodi Prif Gwnstabl newydd i adeiladu ar y sylfeini cryf sydd wedi’u gosod dros y tair blynedd diwethaf.

“Ar ran trigolion ardal Dyfed-Powys, hoffwn ddiolch i Richard am ei wasanaeth a’i ymrwymiad, a dymunaf bob llwyddiant iddo ar gyfer y dyfodol.”

Bydd Comisiynydd yr Heddlu a Throseddu nawr yn dechrau chwilio am Brif Gwnstabl nesaf Heddlu Dyfed-Powys. Yn y cyfamser, bydd y Dirprwy Brif Gwnstabl Ifan Charles yn Brif Gwnstabl dros dro.