Diswyddo Gary Davies, cyn uwch-arolygydd yr heddlu, yn dilyn gwrandawiad camymddwyn difrifol

Rhwng 24 Mawrth a 4 Ebrill 2025, cynhaliwyd Gwrandawiad Camymddwyn Difrifol ym Mhencadlys Heddlu Dyfed-Powys mewn perthynas â’r cyn Uwch-arolygydd Gary Davies. Cadeiriwyd y gwrandawiad gan Mr Oliver Thomas, cadeirydd wedi ymgymhwyso yn y gyfraith.

Mae’r cyn Uwch-arolygydd Gary Davies wedi’i atal o’i waith ers mis Gorffennaf 2022, yn dilyn sawl honiad am ei ymddygiad – yn benodol, ei fod wedi ymddwyn yn amhriodol ac yn wreig-gasaol tuag at gydweithwyr benywaidd rhwng 2017 a 2020. 

Heddiw, canfu’r Cadeirydd bod ymddygiad y cyn Uwch-arolygydd Gary Davies wedi torri’r safonau ymddygiad proffesiynol mewn perthynas ag Awdurdod, Parch a Chwrteisi, Ymddygiad Gwarthus, a Chydraddoldeb ac Amrywiaeth, ac mae’i wedi’i ddiswyddo o Heddlu Dyfed-Powys. Fe fydd nawr yn cael ei ychwanegu at Restr Waharddedig y Coleg Plismona, a fydd yn ei atal rhag ailymuno â’r gwasanaeth heddlu (ar 4 Ebrill 2025).

Dywedodd y Dirprwy Brif Gwnstabl Ifan Charles, yr Awdurdod Priodol ar gyfer cwynion a chamymddwyn yn Heddlu Dyfed-Powys: 

“Mae Heddlu Dyfed-Powys yn disgwyl y safonau ymddygiad proffesiynol uchaf wrth ei swyddogion a’i staff, boed hwy ar ddyletswydd neu beidio – yn enwedig wrth ei dîm uwch arweinwyr.

“Ymddiheuraf i gyn swyddogion a staff, a swyddogion a staff presennol, a gafodd eu herlid gan ymddygiad amhriodol y cyn Uwch-arolygydd Gary Davies, a diolchaf iddynt am eu dewrder drwy adrodd am ei gamymddwyn.

“Rydyn ni wedi clywed am brofiadau nifer o gydweithwyr a chyn gydweithwyr dros y bythefnos diwethaf, y mae’r rhan fwyaf ohonynt yn fenywod sydd wedi dioddef o’i ymddygiad wreig-gasaol wrth iddynt gyflawni eu dyletswyddau.

“Maen nhw’n fodelau rôl, a diolchaf iddynt am yr uniondeb a’r dewrder maen nhw wedi dangos yn y sefyllfa anodd ac annerbyniol hon.

“Gwerthfawrogaf fod yr achos hwn yn frawychus, a gall achosi pryder i’r cyhoedd. Hoffwn eich sicrhau bod camau wedi’u cymryd yn fuan i wahardd yr Uwch-arolygydd Gary Davies unwaith y gwnaed yr honiadau, a bod yr achos hwn wedi’i drin yn ddifrifol iawn. 

“Mae canlyniad gwrandawiad heddiw’n adlewyrchu’r ymagwedd hon, ac rwy’n gobeithio bod hyn yn sicrhau’r cyhoedd y bydd Heddlu Dyfed Powys yn gwneud pob peth y gall i gynnal y safonau uchel a ddisgwylir yn briodol gan swyddogion a staff – yn enwedig y rhai mewn swyddi uwch. 

“Fel heddlu, byddwn ni’n defnyddio pob offeryn sydd ar gael inni er mwyn sicrhau dull effeithlon a chwim o ddiswyddo swyddogion na ddylai bellach ddal swydd cwnstabl.” 

Datganiad gan Gomisiynydd Heddlu a Throseddu Dyfed-Powys, Dafydd Llywelyn:

“Mae'r cyhoedd yn disgwyl y safonau uchaf gan y rhai sy'n gwasanaethu ym maes plismona. Methodd gweithredoedd y cyn Uwcharolygydd Gary Davies â’r disgwyliadau hyn, ac mae ei ddiswyddo yn adlewyrchu ein hymrwymiad i uniondeb, proffesiynoldeb ac ymddiriedaeth y cyhoedd. Nid oes lle yn Heddlu Dyfed-Powys i’r rhai sy’n tanseilio’r gwerthoedd hyn.

“Hoffwn ddiolch i staff a swyddogion presennol a chyn-aelodau, a ddaeth ymlaen i adrodd am y camymddwyn hwn. Rwy’n gwerthfawrogi bod hyn wedi bod yn hynod o anodd iddynt, ond mae eu dewrder wedi bod yn hanfodol i sicrhau atebolrwydd a chynnal y safonau y mae’r cyhoedd yn eu haeddu.”