Gaeaf o Weithredu

Gaeaf o Weithredu

Mae ymgyrch y gaeaf yn mynd rhagddi wrth i dimoedd ledled ardal Dyfed-Powys ddod at ei gilydd i gefnogi Ymgyrch Gaeaf o Weithredu’r Swyddfa Gartref.

Yn ystod ein Gaeaf o Weithredu, mae ein ffocws ar fannau problemus yn parhau wrth inni uno â phartneriaid ledled Dyfed a Phowys i sicrhau bod ein cymunedau’n teimlo’n ddiogel y Nadolig hwn.

Drwy gydol y Nadolig, bydd ein timoedd yn canolbwyntio ar leihau troseddolrwydd yng nghanol trefi, lladradau o siopau, troseddau stryd ac ymddygiad gwrthgymdeithasol gyda phatrolau targedig, ymgysylltu â busnesau lleol ac ymgyrchoedd. Mae’r ymgyrchoedd hyn yn parhau i’r economi nos, gyda’r ymgyrch hefyd yn cynnwys camau i fynd i’r afael â thrais yn erbyn menywod a merched ac ymddygiad gwrthgymdeithasol a thrais sy’n gysylltiedig ag alcohol.

Mae Ymgyrch Ivydene hefyd yn cefnogi’r ymgyrch. Yn 2024, gyda chefnogaeth Swyddfa Comisiynydd yr Heddlu a Throseddu, derbyniodd Heddlu Dyfed-Powys bron hanner miliwn o bunnoedd ar gyfer mynd i’r afael ag ymddygiad gwrthgymdeithasol ledled yr ardal heddlu mewn ymateb penodedig. Yn ystod y flwyddyn gyntaf, cyflwynodd dros 12,000 awr o batrolau penodedig mewn mannau problemus, a lleihaodd adroddiadau am ymddygiad gwrthgymdeithasol 40%.

Gan adeiladu ar lwyddiant y flwyddyn gyntaf, dechreuodd ail flwyddyn Ymgyrch Ivydene yn ystod yr hydref. Dywedodd yr Arolygydd Darren Crockford:

“Ein nod yw adeiladu ar yr hyn y gwnaethom gasglu a dysgu yn y flwyddyn gyntaf. Er ein bod ni dal yn gweithio tuag at y nod gwreiddiol o leihau ymddygiad gwrthgymdeithasol, mae pwyslais ychwanegol yn awr ar leihau troseddau treisgar difrifol, troseddau cyllyll a throseddau mân-werthu hefyd.

“Hyd yn hyn, mae dros 2,050 awr o batrolau wedi’u cynnal ar draws ein mannau problemus, gyda dros 70% o’r patrolau hynny’n cynnwys ymgysylltu â busnesau, elusennau a sefydliadau trydydd sector.”

Mae Ymgyrch Ivydene nawr yn gweithredu yn y trefi canlynol:

• Sir Gaerfyrddin – Rhydaman, Llanelli a Chaerfyrddin
• Ceredigion – Aberystwyth a Llanbedr Pont Steffan
• Sir Benfro – Hwlffordd, Aberdaugleddau a Phenfro
• Powys – y Drenewydd a Llandrindod

Mae ymgysylltu â’r gymuned dal yn allweddol i lwyddiant yr ymgyrch. Yn ystod blwyddyn gyntaf Ymgyrch Ivydene, cynhaliwyd dros 6300 o arolygon gyda’n cymunedau.  

Aeth yr Arolygydd Crockford yn ei flaen i ddweud:

“Mae’r ymatebion i’n harolygon wedi bod yn allweddol o ran cipio teimladau ein cymunedau gan roi data amhrisiadwy inni er mwyn deall pryderon y rhai sy’n byw ac yn gweithio yn y mannau problemus a mynd i’r afael â nhw.”

O strydoedd mawr i briffyrdd, mae ein Hunedau Plismona’r Ffyrdd allan ar y ffyrdd y Nadolig hwn, yn patrolio gan ganolbwyntio ar yfed/cymryd cyffuriau a gyrru. Fodd bynnag, gall goryrru, defnyddio ffôn symudol, peidio â gwisgo gwregys, gyrru heb y gofal a’r sylw dyladwy, a gyrru dan ddylanwad alcohol neu gyffuriau i gyd arwain at wrthdrawiadau angheuol a difrifol – a rhain yw’r achosion mwyaf cyffredin yr adroddir amdanynt mewn perthynas â gwrthdrawiad angheuol, sef y ‘5 Angheuol’.

Yn Heddlu Dyfed-Powys, rydyn ni’n plismona dros 8500 milltir o ffyrdd. Dim ond drwy gydweithio y gallwn hyrwyddo gyrru mwy diogel ar bob un ohonynt i wella diogelwch y ffyrdd, ac yn y pen draw, helpu i achub bywydau. 

Mae’r amser hwn o'r flwyddyn yn neilltuol o ingol, ond ar unrhyw adeg, o ydych chi’n gyrru, peidiwch â theimlo dan bwysau i wneud unrhyw ddewisiadau fyddwch chi’n difaru. Chi sy’n gyfrifol am aros yn ddiogel a sobor tu ôl i’r olwyn.

Cewch y wybodaeth ddiweddaraf am weithgareddau ein timoedd yn ystod yr ymgyrch Gaeaf o Weithredu ar ein sianeli cyfryngau cymdeithasol lleol a thrwy ein gwasanaeth negeseua am ddim, Cyswllt Dyfed-Powys.