Heddlu Dyfed-Powys i werthu Gorsaf Heddlu Gelli Gandryll

Mae Heddlu Dyfed-Powys wedi cadarnhau eu bod am werthu Gorsaf Heddlu Gelli Gandryll ac adleoli i ganolfan newydd gyda Gwasanaeth Tân ac Achub Canolbarth a Gorllewin Cymru (GTACGC).

Mae Heddlu Dyfed-Powys wedi nodi nad yw Gorsaf Gelli Gandryll yn bodloni gofynion plismona modern.

O ganlyniad, ac fel rhan o gynllun arbed £10m dros dair blynedd, mae penderfyniad wedi ei wneud i gau'r gorsafoedd yn ffurfiol a gwerthu'r eiddo.

Mae’r penderfyniad hwn yn rhan o raglen newid fwy ar draws Heddlu Dyfed-Powys, lle mae ystadau a thechnoleg a’r offer sydd ar gael i swyddogion a staff yn dod at ei gilydd i wella plismona a’r gwasanaeth i’n cymunedau.

Bydd Heddlu Dyfed-Powys yn cynnal eu presenoldeb yn Gelli Gandryll, ac yn gweithredu o ganolfan cydleoli newydd, gyda Gwasanaeth Tân ac Achub Canolbarth a Gorllewin Cymru sy’n bartner Golau Glas pwysig gyda pherthynas hirsefydlog eisoes yn bodoli. Bydd cydweithio â GTACGC yn golygu y gall Heddlu Dyfed-Powys barhau i sicrhau presenoldeb gweladwy ac ymgysylltu’n effeithiol â thrigolion lleol a busnesau yn y dref.

Dywedodd y Prif Gwnstabl Dr Richard Lewis:

“Mae’r penderfyniad hwn wedi dod ar ôl gwerthusiad gofalus i wneud y defnydd gorau o adnoddau a darparu gwasanaeth heddlu effeithiol sy’n bodloni anghenion a disgwyliadau ein cymunedau.

“Mae cau a gwerthu’r gorsafoedd heddlu hyn yn gam ymlaen o ran moderneiddio a gwella ein gwasanaethau, gan alluogi swyddogion i barhau â’u gwaith yn fwy effeithlon ac effeithiol.

“Mae’r penderfyniad wedi’i wneud gyda budd gorau’r trethdalwyr a’r gymuned mewn golwg, gan nad yw’r gorsafoedd presennol yn bodloni gofynion plismona modern a’u bod yn ddrud i’w rhedeg.

“Rwyf am roi sicrwydd i’n cymunedau lleol bod Heddlu Dyfed-Powys wedi ymrwymo i gynnal yr un lefel o wasanaeth a chefnogaeth i’n cymunedau lleol, ac ni fydd trigolion a busnesau yn Llanfyllin yn gweld unrhyw wahaniaeth.

“Bydd eich timau plismona bro ac atal lleol yn parhau i ddarparu presenoldeb gweladwy ac ymgysylltu effeithiol â thrigolion a busnesau.”

Dywedodd y Comisiynydd Heddlu a Throsedd, Dafydd Llywelyn:

“Mae trafodaethau ynghylch gorsafoedd heddlu’n cau neu’n cael eu gwerthu, yn y gorffennol, wedi tanio pryderon am welededd yr heddlu, amseroedd ymateb, a diogelwch cymunedol. Rwy’n deall y pryderon hynny’n llwyr.

“Fodd bynnag, mae’r Prif Gwnstabl Dr Richard Lewis wedi fy sicrhau na fydd y penderfyniad ystadau hwn yn effeithio ar lefel y gwasanaeth a ddarperir i’r cyhoedd.

“Er nad yw’r newidiadau hyn yn hawdd, rwyf am fod yn glir - nid yw ein hymrwymiad i ddiogelwch y cyhoedd wedi newid. Mae'r penderfyniad hwn yn ymwneud â sicrhau y gall Heddlu Dyfed-Powys weithredu mor effeithlon â phosibl, gan sicrhau bod swyddogion ac adnoddau yn y lleoedd cywir i wasanaethu ein cymunedau'n effeithiol.

“Mewn byd cynyddol ddigidol, mae mwy o ffyrdd nag erioed bellach i bobl gadw mewn cysylltiad â Heddlu Dyfed-Powys. Ochr yn ochr â chyswllt ffôn traddodiadol, rwy’n annog y cyhoedd i ddefnyddio gwasanaethau ar-lein a sianeli cyfryngau cymdeithasol yr Heddlu, sy’n cynnig diweddariadau pwysig, cyngor atal trosedd, a chyfleoedd i ymgysylltu.

 “Trwy gofleidio’r ffyrdd amgen hyn o gyfathrebu, gallwn ni i gyd chwarae rhan mewn sicrhau bod plismona’n parhau i fod yn ymatebol ac yn hygyrch, tra’n caniatáu i swyddogion ganolbwyntio ar ddigwyddiadau critigol.

“Os oes gennych unrhyw bryderon neu gwestiynau, cysylltwch â fy swyddfa. Mae eich adborth yn bwysig, ac rydym yn gwerthfawrogi eich cefnogaeth i gadw ein cymunedau’n ddiogel.”

Dywedodd Prif Swyddog Tân GTACGC, Roger Thomas KFSM:

“Mae’n bleser gan GTACGC ddatblygu ei bartneriaeth gyda Heddlu Dyfed-Powys gan barhau â’r berthynas hirsefydlog a chadarnhaol sydd gennym ag un o’n partneriaid golau glas.

Mae ein Gwasanaeth wedi ymrwymo i gadw cymunedau Canolbarth a Gorllewin Cymru yn ddiogel a thrwy gynyddu nifer y Gorsafoedd Tân cymunedol sydd ar gael i Swyddogion Heddlu Dyfed-Powys, mae’n gwella ein gallu i gydweithio’n agosach ymhellach.”

Os oes angen yr heddlu arnoch pan nad yw’n argyfwng, gallwch gysylltu â nhw drwy neges uniongyrchol ar Facebook, X, ar-lein, drwy e-bostio: [email protected], neu drwy ffonio 101.

Os ydych yn fyddar, yn drwm eich clyw, neu â nam ar eich lleferydd tecstiwch y rhif difrys ar 07811 311 908. Os oes trosedd yn digwydd, neu os oes perygl i fywyd, risg o anaf difrifol, neu ddifrod i eiddo, ffoniwch 999 bob amser.