Orsaf Heddlu Llandeilo i’w rhoi ar y farchnad

Mae'r eiddo a fu gynt yn gartref i orsaf Heddlu Dyfed-Powys yn Llandeilo i'w werthu, yn unol â newidiadau ehangach a fydd yn moderneiddio a gwella'r gwasanaeth plismona yn Llandeilo.

Bydd swyddogion sy'n gwasanaethu cymuned Llandeilo yn parhau i weithio o'u canolfan newydd yng Ngorsaf Dân ac Achub Canolbarth a Gorllewin Cymru (GTACGC) yn Llandeilo ac yn parhau i sicrhau presenoldeb gweladwy ac ymgysylltu effeithiol â thrigolion a busnesau yn Llandeilo.

Mae GTACGC yn bartner Golau Glas pwysig gyda pherthynas hirsefydlog eisoes yn bodoli rhwng y gwasanaeth a Heddlu Dyfed-Powys.

Mae’r gwerthiant hwn yn rhan o raglen newid ar draws Heddlu Dyfed-Powys, lle mae ystadau, technoleg, a’r offer sydd ar gael i swyddogion a staff yn dod ynghyd i wella plismona a’r gwasanaeth i gymunedau.

Dywedodd y Prif Gwnstabl Dr Richard Lewis:

“Mae’r penderfyniad hwn wedi dod ar ôl gwerthusiad gofalus i wneud y defnydd gorau o adnoddau a darparu gwasanaeth heddlu effeithiol sy’n bodloni anghenion a disgwyliadau ein cymunedau.

“Nid yw’r adeilad yn weithredol ar hyn o bryd, gan iddo gael ei nodi fel un nad yw’n bodloni gofynion plismona modern.

“Mae gwerthu’r eiddo hefyd yn gam ymlaen o ran moderneiddio a gwella ein gwasanaethau, gan alluogi swyddogion i barhau â’u gwaith yn fwy effeithlon ac effeithiol.

“Mae’r penderfyniad wedi’i wneud gyda lles gorau’r trethdalwyr a’r gymuned mewn golwg, gan nad yw’r adeilad presennol yn weithredol bellach.

“Rwyf am sicrhau’r gymuned leol bod Heddlu Dyfed-Powys wedi ymrwymo i gynnal yr un lefel o wasanaeth a chefnogaeth i’n cymunedau lleol, a thrigolion a busnesau yn Llandeilo. Ni fydd unrhyw newidiadau I lefel y gwasanaeth I’r gymuned.

“Bydd eich tîm plismona bro ac atal lleol yn parhau i ddarparu presenoldeb gweladwy ac ymgysylltu effeithiol â thrigolion a busnesau.”

Bydd yr adeilad yn Llandeilo yn mynd i'r farchnad yn y misoedd nesaf.

Dywedodd Comisiynydd yr Heddlu a Throseddu Dafydd Llywelyn: “Nid yw’r hen orsaf yn Llandeilo wedi cael ei defnyddio’n weithredol fel Gorsaf Heddlu ers peth amser.

“Yn hanesyddol, mae sôn am ganolfannau heddlu’n symud neu orsafoedd yn cau ac yn cael eu gwerthu, wedi sbarduno naratif o heddlu’n tynnu’n ôl o gymunedau, ofnau am amseroedd ymateb, a phryderon am gynnydd mewn trosedd ac anhrefn. Felly, hoffwn roi sicrwydd i’r gymuned leol nad yw Heddlu Dyfed-Powys yn tynnu gwasanaethau’n ôl o dref Llandeilo.

“Mae cydweithio â gwasanaethau brys golau glas eraill i ddarparu sylfaen weithredol sy’n addas i’r diben yn gam ymlaen i foderneiddio a gwella ein gwasanaethau, gan alluogi ein swyddogion i barhau â’u gwaith hanfodol gyda mwy o effeithlonrwydd ac effeithiolrwydd.”

“Yn yr oes ddigidol sydd ohoni, rydym yn ffodus i gael sianeli amrywiol y gall pobl gysylltu â Heddlu Dyfed-Powys drwyddynt. Yn ogystal â galwadau ffôn, rydym yn annog pobl i archwilio dulliau ar-lein a llwyfannau cyfryngau cymdeithasol a ddefnyddir gan yr Heddlu. Mae'r llwyfannau hyn yn aml yn darparu diweddariadau gwerthfawr, cyngor atal trosedd, a chyfleoedd ymgysylltu cymunedol, gan alluogi pobl i gysylltu ac ymgysylltu â'r heddlu a chael gwybod am faterion lleol.

“Trwy ddefnyddio’r sianeli amgen hyn, gallwn gyda’n gilydd gyfrannu at blismona mwy ymatebol ac effeithlon, gan alluogi Heddlu Dyfed-Powys i ganolbwyntio ar sefyllfaoedd argyfyngus tra’n dal i fynd i’r afael â phryderon ac anghenion ein cymuned.

“Os oes gan unrhyw un gwestiynau neu bryderon, fe’ch anogaf i gysylltu â’m swyddfa. Rydym yn gwerthfawrogi eich mewnbwn ac yn gwerthfawrogi eich cefnogaeth barhaus i sicrhau diogelwch a lles ein cymunedau.”

Gall cymunedau lleol gyfrannu at blismona mwy ymatebol ac effeithlon drwy ddefnyddio dulliau cyswllt ar-lein. Os oes angen yr heddlu arnoch pan nad yw’n argyfwng, gallwch gysylltu â nhw drwy neges uniongyrchol ar Facebook, X, ar-lein, drwy e-bostio [email protected], neu drwy ffonio 101. Os ydych chi’n fyddar, yn drwm eich clyw, neu â nam ar eich lleferydd, anfonwch neges destun at y rhif nad yw’n argyfwng ar 07811 311 908.

Dilynwch eich Timau Plismona Bro yn Heddlu Llandeilo a Llanymddyfri ar Facebook i gael yr holl newyddion plismona, apeliadau a hysbysiadau am ddigwyddiadau ymgysylltu.

Os oes trosedd ar y gweill, neu os oes perygl i fywyd, risg o anaf difrifol, neu ddifrod i eiddo, ffoniwch 999 bob amser.