Dedfryd euog mewn ymchwiliad i lofruddiaeth

Mae dyn a laddodd cariad ei fab mewn pwl o dymer wedi ei gael yn euog o lofruddiaeth.

Gwadodd Richard Jones iddo lofruddio Sophie Evans, ond fe gyfaddefodd gyhuddiad o ddynladdiad – gan ddweud ei fod wedi gwylltio pan oedd yn amau bod y dioddefydd a’i chariad, sef ei fab, Jamie Davies, yn ceisio ei dwyllo.

Wedi achos llys pythefnos o hyd, penderfynodd y rheithgor bod y dyn 50 oed o Y Rhoddfa, Porth Tywyn, yn euog.

Clywodd y llys sut y cyrhaeddodd Jones gartref Sophie ar Ffordd Bigyn, Llanelli, am 9.19y.b. ar 5 Gorffennaf 2024. Cafodd ei ddal ar gamera cloch y drws yn siarad â Sophie ar y ffôn cyn iddi ei adael i mewn drwy’r drws ffrynt.

Bu yn y cartref am ddim ond 40 munud cyn i deledu cylch cyfyng ei ddangos yn rhedeg yn ôl at ei gar, cyn dychwelyd i'r tŷ ac yna'n gyrru i ffwrdd. Erbyn hyn, roedd wedi ymosod ar Sophie a’i gadael yn farw yn ei chegin.

Yn dilyn y digwyddiad, roedd ffilm TCC yn dangos Jones yn gyrru i ganol tref Llanelli lle yr ymwelodd â’r banc a siop fara cyn mynd adref i Borth Tywyn. Erbyn 10.35y.b., roedd wedi gadael ei gartref yn ei gar a gyrru i Barc Gwledig Pen-bre.

Drwy gyfres o negeseuon testun at gyn-bartner, esboniodd Jones ei fod yn credu ei fod wedi cael ei ‘dwyllo’ ac na fyddai ‘o gwmpas’. Roedd wedi amau bod Sophie a’i fab, Jamie Davies, yn ceisio ei dwyllo.

Am 5.27y.h. derbyniodd Heddlu Dyfed-Powys alwad 999 yn adrodd bod Richard Jones wedi lladd Sophie Evans. Aeth swyddogion i’w chyfeiriad yn syth, gan dorri i mewn drwy’r drws cefn. Daethpwyd o hyd i Sophie ar lawr y gegin a chadarnhawyd ei bod hi wedi marw.

15 munud yn ddiweddarach, anfonodd Jones neges destun arall i’w gyn-bartner yn gofyn iddi beidio â dweud dim.

Yn dilyn ymholiadau, daeth yr heddlu o hyd i Jones ger y fynedfa i Barc Gwledig Pen-bre am 8 o’r gloch y noson honno. Cafodd ei arestio ar amheuaeth o lofruddiaeth a'i gludo i'r ysbyty lle bu am bedwar diwrnod.

Pan gyrhaeddodd y ddalfa ar 9 Gorffennaf 2024, galwodd Jones ei fam, a dywedodd wrthi ei fod wedi ‘gwneud llanast o bethau eto’.  

Yn ystod eu hymholiadau, daeth swyddogion o hyd i nodiadau yr oedd Jones wedi’u hysgrifennu yn dweud, ‘Cefais fy nhwyllo a’m blingo gan fy mab fy hun, felly ymdriniais â’r mater fy hun, doedd gen i ddim dewis arall’.

Ar 11 Gorffennaf, ar ôl naw cyfweliad, cafodd ei gyhuddo o lofruddio Sophie Evans.

Dywedodd y Ditectif Uwch-arolygydd Gareth Roberts:

“Rydym yn croesawu euogfarn y llys. Mae ein meddyliau ar yr adeg hon gyda Sophie a’r teulu a ffrindiau oedd yn ei charu. Roedd Sophie yn fam ifanc, yn aelod annwyl o’r teulu ac yn ffrind. Mae Richard Jones wedi ei gael yn euog o weithred ddisynnwyr, lwfr a sbardunwyd gan ddicter a thymer. Roedd Sophie yn ei chartref ei hun a doedd hi ddim mewn sefyllfa i amddiffyn ei hun rhag gweithred greulon Richard Jones o drais. Bydd y teulu’n cael rhywfaint o gysur ei fod bellach wedi’i dynnu o gymdeithas ac na all niweidio unrhyw un arall.”

Bydd Richard Jones yn ymddangos yn y llys ar Fawrth 3ydd i'w ddedfrydu.