Amnest Cenelaethol Dryllau

Mae Heddlu Dyfed-Powys yn uno â heddluoedd ledled y DU i gynnal amnest pedair wythnos o hyd ar gyfer drylliau creu sŵn (TVBFs) a gynhyrchwyd yn Nhwrci sydd â’r enwau brand BLOW, CEONIC, EKOL a RETAY, sydd bellach yn anghyfreithlon ar ôl i’r Asiantaeth Troseddu Cenedlaethol eu profi.

Er bod troseddau drylliau yn y DU yn parhau i fod yr isaf yn y byd, yn dilyn pryderon a fynegwyd am y pedwar dryll creu sŵn penodol hwn, a’u gallu i gael eu troi’n arfau saethu sy’n medru saethu bwledi byw, mae Arweinydd Defnydd Troseddol o Arfau Saethu Cyngor Cenedlaethol Prif Swyddogion yr Heddlu wedi cytuno â Phrif Gwnstabliaid y bydd amnest yn cael ei gynnal o Ddydd Llun  3 –  Dydd Gwener 28 Chwefror 2025, a fydd yn eich galluogi i gael gwared ar eich arf saethu’n ddiogel.

Ar ôl yr amnest, gall unrhyw un sydd ag unrhyw un o’r pedwar math o ddryll creu sŵn Twrcaidd gael ei erlyn a’i anfon i’r carchar am hyd at 10 mlynedd.

Dywedodd yr Arolygydd Fencott-Price o Heddlu Dyfed-Powys:

“Er y bydd pobl wedi prynu'r rhain gan gredu eu bod yn gyfreithlon ar gyfer y modd y bwriadwyd eu defnyddio, mae’n bwysig eich bod chi’n ymwybodol o’r newidiadau yn y gyfraith sy’n eu gwneud nhw’n arfau saethu gwaharddedig.

Deallwn y bydd pobl wedi prynu'r rhain yn gyfreithlon, fodd bynnag, ni chewch eu cadw yn eich meddiant bellach, ac fe’ch anogwn i gymryd rhan yn yr amnest pedair wythnos hwn.

Yn eu cyflwr cyfreithlon, maent wedi’u cynllunio i ryddhau cetris blanc yn unig, ac maen nhw’n cael eu gwerthu â 50% o’r arwyneb sydd mewn golwg wedi’i baentio mewn lliwiau llachar i’w helpu i sefyll allan fel arfau saethu annichonadwy.

Fodd bynnag, yn anffodus, maen nhw’n apelio at droseddwyr a thramgwyddwyr sy’n eu newid o’u cyflwr cyfreithlon, ac ers 2021, mae asiantaethau gorfodi’r gyfraith yn y DU wedi adennill dros 800 o’r drylliau hyn mewn amgylchiadau troseddol.

Rydyn ni eisiau i gymaint â phosibl o ddrylliau cadw sŵn Twrcaidd gael eu hildio. Ni fydd unigolion na sefydliadau sy’n ildio’r arf saethu yn ystod y cyfnod amnest yn cael eu herlyn am feddu ar arf sydd wedi’i wahardd, a chewch ei ildio’n ddienw os ydych chi’n dymuno hynny.

“Anogwn unrhyw un sydd â dryll creu sŵn i gymryd rhan yn yr amnest cenedlaethol hwn, a’i gyflwyno i un o’n gorsafoedd heddlu dewisol isod cyn 28 Chwefror 2025 er mwyn helpu i’w hatal rhag cyrraedd y dwylo anghywir yn y dyfodol.”

Ein lleoliadau dewisol ar gyfer yr amnest yw:

• Sir Gaerfyrddin: Gorsafoedd heddlu Rhydaman, Caerfyrddin a Llanelli
• Sir Benfro: Gorsaf heddlu Hwlffordd
• Ceredigion: Gorsafoedd heddlu Aberystwyth ac Aberteifi
• Powys: Gorsafoedd heddlu Aberhonddu, Llandrindod a’r Drenewydd

Cewch ymweld â’r gorsafoedd o 8y.b. – 4y.h. o ddydd Llun i ddydd Gwener. Atgoffir y rhai sy’n dymuno cymryd rhan yn yr amnest i’w cludo’n gyfrifol.

Os na allwch deithio i un o’r lleoliadau yn ystod yr amnest, gallwch ein galw ar 101 a byddwn ni’n medru trafod hyn gyda chi er mwyn sicrhau eich bod chi’n gallu cymryd rhan.

Os oes gennych unrhyw amheuon, fe’ch anogwn i gysylltu â ni.