Carcharu dynes am achosi marwolaeth Mabli Hall, 8 mis oed, mewn gwrthdrawiad ‘di-hid’

Mae dynes wedi’i charcharu am bedair blynedd am achosi marwolaeth baban mewn gwrthdrawiad tu allan i Ysbyty Cyffredinol Llwynhelyg.

Tarodd Bridget Carole Curtis, 70 oed, Mabli Cariad Hall, 8 mis oed, pan oedd hi yn ei phram tu allan i Ysbyty Llwynhelyg ar 21 Mehefin 2023.

Cafodd Mabli ei chludo i’r ysbyty mewn ambiwlans awyr, lle bu farw yn ystod oriau mân y bore ar 25 Mehefin er waethaf ymdrechion gorau staff meddygol.

Yn dilyn ymchwiliad gan yr heddlu, cyhuddwyd Curtis o achosi marwolaeth drwy yrru’n beryglus ar 24 Gorffennaf 2024. Ymddangosodd yn Llys y Goron Abertawe ar 20 Medi 2024, lle plediodd yn euog.

Heddiw, cafodd ei dedfrydu i bedair blynedd o garchar. Bydd hi hefyd yn cael ei gwahardd rhag gyrru am wyth mlynedd, a bydd yn rhaid iddi lwyddo mewn prawf estynedig cyn y bydd hi’n cael gyrru eto.

Gan siarad yn y llys, dywedodd rhieni Mabli bod eu teulu cyfan wedi’u ‘chwalu a’u dinistrio’ gan weithredoedd Curtis y diwrnod hwnnw, ac na fyddent byth yn dod dros y galar o golli eu baban.  

Wrth ddedfrydu Curtis, dywedodd Ei Anrhydedd y Barnwr Geraint Walters fod bywyd Mabli wedi’i gipio’n ‘ddisynnwyr a diangen’, gan ychwanegu ei fod yn anodd dychmygu achos ‘mwy ofnadwy o ddi-hid’ na hyn.  

Dywedodd y Rhingyll Sara John o Uned Ymchwilio i Wrthdrawiadau Difrifol Heddlu Dyfed-Powys: “Mae ein meddyliau’n parhau gyda theulu Mabli, sydd wedi gorfod dioddef y boen o’i cholli yn yr amgylchiadau trasig a chwbl osgoadwy hyn.  

“Roedd hwn yn ymchwiliad anodd, ac rydyn ni’n ddiolchgar i deulu Mabli am eu hamynedd a’u hurddas wrth iddynt aros am y canlyniad hwn heddiw.”

 

DATGANIAD GAN Y TEULU:

Fel teulu, hoffem ddiolch i Heddlu Dyfed-Powys a phawb arall sydd wedi bod yn gysylltiedig â sicrhau cyfiawnder ar gyfer Mabli heddiw.

Bu’n 19 mis dirdynnol i gyrraedd y pwynt hwn, ond gwerthfawrogwn mor gymhleth yw’r ymchwiliadau hyn er mwyn sicrhau’r canlyniad cywir.

Mae’n rhaid inni lywio gweddill ein bywydau heb ein babi bach, Mabli Cariad, a gwblhaodd ein teulu nawr. Fel rhieni, mae’n rhaid inni barhau i gefnogi ein plant eraill i ymdopi â’u galar dwfn, galar yr ydym yn ei rannu pob eiliad o bob dydd.

Mabli Cariad oedd yr heulwen yn ein bywydau, a byddwn yn ei charu a’i cholli am byth.

Os oes gwers i’w ddysgu o farwolaeth ddiangen Mabli, y ffaith bod angen i bawb sy’n eistedd tu ôl i olwyn cerbyd sylweddoli eu bod nhw’n gyfrifol am eu gweithredoedd eu hun a lles eraill yw hynny.