Yr heddlu a Cwm Amgylcheddol yn dod at ei gilydd er mwyn cael gwared ar gyllyll a atafaelwyd yn ddiogel

Roedd cleddyfau samwrai, dagerau, machetes a hyd yn oed cyllyll hollti cig ymysg yr arfau a ddinistriwyd fel rhan o bartneriaeth newydd i fynd i’r afael â throsedd cyllyll.

Mae’r cydweithredu rhwng Heddlu Dyfed-Powys a’r cwmni rheoli gwastraff CWM Amgylcheddol yn sicrhau bod cyllyll sydd wedi’u hatafaelu’n cael eu dinistrio’n ddiogel a chyfrifol.

Hwn yw’r tro cyntaf i’r heddlu weithio mewn partneriaeth â’r cwmni o Sir Gaerfyrddin, ac mae’n nodi cam sylweddol ymlaen yn ymdrechion parhaus yr heddlu i fynd i’r afael â throseddau cyllyll ar ein strydoedd a gwella diogelwch cymunedol.

Casglwyd y cyllyll yn ddiogel gan CWM Amgylcheddol wythnos diwethaf, gan gynnwys nifer sylweddol o arfau a gyflwynwyd i’r heddlu’n wirfoddol drwy gasgliadau amnest amrywiol.

💬 Dywedodd y Ditectif Brif Arolygydd Rhys Jones:

“Mae Heddlu Dyfed-Powys yn atafaelu amryw o gyllyll fel rhan o drosedd neu fel rhan o amnest, ac maen nhw wedi ymuno â CWM Amgylcheddol a Chyngor Sir Gaerfyrddin er mwyn sicrhau eu bod nhw’n cael eu gwaredu’n ddiogel.  

“Mae pob cyllell rydyn ni’n cael gwared arnynt o’n strydoedd yn cynrychioli bywyd a allai fod wedi’i achub. Drwy weithio mewn partneriaeth â CWM Amgylcheddol, byddwn ni’n sicrhau bod yr eitemau peryglus hyn yn cael eu hatafaelu a’u dinistrio mewn modd diogel a chyfrifol gyda’r nod o wneud Dyfed-Powys yn le mwy diogel i fyw.”

Mae CWM Amgylcheddol yn arweinydd yn er economi cylchol, ac mae wedi ymrwymo i helpu cymunedau i fyw’n fwy cynaliadwy. Fel busnes sydd wedi rhoi’r gorau i dirlenwi, mae’r cwmni’n canolbwyntio ar ffyrdd arloesol o leihau gwastraff a chreu newid amgylcheddol cadarnhaol.  

Yn ei brif bentref ailddefnyddio, Canolfan Eto, mae eitemau wedi’u hailwampio, megis beiciau, teganau a hen ddodrefn, yn cael ail fywyd. Mae CWM Amgylcheddol hefyd yn cynhyrchu compost organig o safon uchel ac yn cefnogi bioamrywiaeth gyda chychod gwenyn ar y safle. 

Drwy raglenni addysgol diddorol, sy’n cynnwys gweithdai a phrofiadau realiti rhithwir, mae’r cwmni’n ysbrydoli’r genhedlaeth nesaf i gofleidio egwyddorion ailddefnyddio, ailgylchu a chynaliadwyedd.  

💬 Dywedodd Sean Gallagher, Rheolwr Gyfarwyddwr CWM Amgylcheddol:

“Rydyn ni wedi ymrwymo i gefnogi mentrau sy’n gwella diogelwch a lles ein cymunedau. Mae gweithio mewn partneriaeth gyda Heddlu Dyfed-Powys i gael gwared ar gyllyll a atafaelwyd neu rai a gyflwynwyd adeg amnest cyllyll yn gyfrifol yn rhan bwysig o’r ymrwymiad hwnnw.

“Drwy sicrhau bod yr eitemau hyn yn cael eu symud o gylchrediad a’u trin yn gynaliadwy, rydyn ni’n helpu i leihau niwed posibl ac yn cyfrannu at amgylchedd mwy diogel i bawb. Mae’r cydweithio hwn yn dangos sut y gall sefydliadau weithio gyda’i gilydd i gael effaith gadarnhaol, ac rydym yn falch o chwarae’n rhan yn y fenter hanfodol hon.”