Gwastraff cyffuriau a adawyd mewn canolfan ailgylchu yn Aberystwyth yn arwain yr heddlu at ffatri ganabis

Gwastraff cyffuriau a adawyd mewn canolfan ailgylchu yn Aberystwyth yn arwain yr heddlu at ffatri ganabis

Arweiniodd darganfyddiad coesau canabis a adawyd mewn canolfan ailgylchu yn Aberystwyth swyddogion at dyfiant cyffuriau gwerth hyd at £242,000 ar y stryd.

Diolch i staff gwyliadwrus y ganolfan yn adrodd am y drosedd a chamau gweithredu cyflym wedyn gan yr heddlu, mae’r ffermwr cyffuriau Manuel Nerguti dan glo ar ôl cael ei euogfarnu o gynhyrchu cyffur dosbarth B.

Clywodd Llys y Goron Abertawe bod yr heddlu wedi derbyn adroddiad bod tua pedwar neu bump bag o wastraff canabis wedi’u gadael yn y ganolfan ailgylchu ar 1 Mai 2025 gan ddynion yn defnyddio fan Ford Transit wedi’i llogi.

Yn ddiweddarach y prynhawn hwnnw, stopiodd swyddogion y fan, a oedd yn teithio rhwng Aberystwyth ac Aberteifi. Arestiwyd Nerguti, 20 oed, ynghyd â dau ddyn arall, ar amheuaeth o fod yn gysylltiedig â chyflenwi canabis, ond cawsant eu rhyddhau gan nad oedd modd dod o hyd i ganabis yn cael ei dyfu.

Fis yn ddiweddarach, diolch i gudd-wybodaeth yr heddlu, cynhaliodd swyddogion warant mewn tŷ adfeiledig ym Mridell, Aberteifi, lle y daethpwyd o hyd i 260 o blanhigion canabis aeddfed ar draws pum ystafell ac atig.

Roedd y cyflenwad trydan wedi’i osgoi mewn modd soffistigedig ac roedd teclynnau a oedd yn gyson â masnachu cyffuriau’n bresennol.

Yn ystod y cyrch ar 7 Mehefin, ceisiodd y diffynnydd redeg i ffwrdd wrth yr heddlu, ond daethpwyd o hyd iddo’n cuddio tu ôl i beiriant golchi yn y garej.

Plediodd Nerguti’n euog yn Llys y Goron Abertawe ddydd Gwener diwethaf (11 Gorffennaf) a chafodd ei ddedfrydu i chwe mis o garchar. 

Roedd y Ditectif Gwnstabl Sam Garside, a oedd yn arwain yr ymchwiliad, eisiau tynnu sylw at staff y ganolfan ailgylchu am eu meddwl chwim o ran adrodd am y gwastraff canabis. 

Meddai: “Cafwyd y canlyniad hwn diolch i staff y ganolfan ailgylchu, a adnabyddodd bod gweithgarwch troseddol yn digwydd ac a hysbysodd yr heddlu’n gyflym.

“Rydyn ni’n dibynnu ar y cyhoedd i’n hysbysu am unrhyw beth amheus sy’n digwydd yn eu cymunedau ac anogwn bobl i gysylltu â ni os ydynt yn amau unrhyw beth amheus.

“Roedd modd inni ddefnyddio ein gwybodaeth leol a chudd-wybodaeth yr heddlu i weithredu gwarant lwyddiannus i helpu i gau ffatri ganabis anghyfreithlon yn ardal Aberteifi. Rydyn ni wedi ymrwymo i gynnal hyd yn oed mwy o ymgyrchoedd cyffuriau ledled ardal Dyfed-Powys, a pharhau i sicrhau bod mwy o droseddwyr fel Nerguti yn cael eu dwyn i gyfiawnder.”

Cewch ragor o wybodaeth am Ymgyrch Scotney, gan gynnwys sut i adnabod arwyddion ffatri ganabis, yma: Ymgyrch Scotney | Heddlu Dyfed-Powys