Gweithredoedd dewr cadét heddlu yn arwain at arést troseddwr mynych.

Mae Tyler Brian, gwirfoddolwr gweithgar gyda Chadetiaid Heddlu Gwirfoddol y Drenewydd, wedi ei ganmol gan ein huned rheoli troseddwyr am ei weithredoedd, a arweiniodd at arést troseddwr ar ffo.

Ym mis Hydref 2024, roedd yr heddlu wrthi’n chwilio am unigolion a oedd, yn ôl pob sôn, wedi dwyn teledu ac yn meddu ar lafn.

Gwelodd Tyler, a oedd ar ei ffordd i’r gwaith, gerbydau heddlu a hofrennydd yn yr awyr. Wrth chwilio am y troseddwr, siaradodd swyddogion â Tyler i weld pa un ai a ydoedd wedi gweld y troseddwr. 

Gan alw’r diwrnod hwnnw i gof, dywedodd Tyler ei fod wedi mynd yn ei flaen i’w waith pan fethodd â helpu’r heddlu â’r chwiliad.  

“Wrth imi gyrraedd yr adeilad, digwyddais edrych ar y monitor TCC.”

Mewn tro annisgwyl, arweiniodd y penderfyniad sydyn hwnnw i gael cip ar y monitor ei ato’n cael “cipolwg o’r troseddwr”. 

Gan gofio disgrifiad y swyddog, penderfynodd Tyler, ag yntau ond yn 15 oed, alw’r heddlu.

“Y peth iawn i’w wneud yn yr achos hwn oedd dilyn y troseddwr, oherwydd fy mhryderon ynghylch perygl i’r gymuned. Sicrheais fy mod i’n sefyll pellter diogel i ffwrdd gan nad oeddwn i’n gwybod pa un ai oedd yr eitem â llafn dal ym meddiant y troseddwr,” meddai.

Gan aros yn ddigynnwrf a sylwgar, rhoddodd sylwebaeth barhaus i’r triniwr galwadau, a sicrhaodd bod Tyler yn aros yn ddiogel tan iddo gwrdd â swyddogion.

“Er fy mod i’n gwybod y byddai’r heddlu’n cyrraedd yn fuan ar ôl iddynt dderbyn yr alwad ffôn, roeddwn i’n poeni y byddai rhywun yn y gymuned yn cael loes yn hytrach na phoeni amdanaf fy hun.”

Dywedodd Tyler, a oedd ond wedi bod yn gadét am flwyddyn ar y pryd, “Fe wnaeth y cyflwyniadau gwahanol a gawsom gan yr unedau gwahanol yn ein sesiynau cadetiaid fy helpu. Rhoddodd ddealltwriaeth imi o sut y gallwn gefnogi’r heddlu a beth oedd yn bwysig sylwi arno a throsglwyddo.

“Roedd dysgu’r wyddor ffonetig yn ddefnyddiol iawn pan oeddwn i ar y ffôn i’r triniwr galwadau.”

Heb os nac oni bai, arweiniodd gweithredoedd Tyler y diwrnod hwnnw at arést arwyddocaol, ac yntau wedi rhoi diogelwch eraill cyn ei ddiogelwch ei hun. Gan ddangos dewrder, aeddfedrwydd aruthrol, a phroffesiynoldeb, yn ddiweddar, derbyniodd Tyler y wobr Cadét Heddlu’r Flwyddyn, a noddwyd gan CDW, yng Ngwobrau Heddlu Dyfed-Powys, a gynhaliwyd ym Mhencadlys yr Heddlu ddydd Gwener 4 Gorffennaf.

“Roeddwn i’n llawn llawenydd a chyffro o gael cyrraedd y rownd derfynol gyda dau o’m cyd gadetiaid, a oedd hefyd wedi’u cydnabod am eu gwaith yn eu hunedau cadetiaid.

“Roeddwn i’n gegrwth ar ôl cael fy nghyhoeddi fel enillydd y wobr Cadét Heddlu’r Flwyddyn ar gyfer Heddlu Dyfed-Powys cyfan,” meddai.

Yn ei enwebiad ar gyfer y wobr, dywedodd ei Arweinydd Cadetiaid, SCCH Melanie Ross, “Mae Tyler bob amser yn barod i fynd uwchlaw a thu hwnt ar gyfer cadetiaid heddlu gwirfoddol a Heddlu Dyfed-Powys. Y mae bob amser yn mynd yr ail filltir yn ei rôl fel cadét heddlu ac mae’n llysgennad neilltuol ar gyfer plismona yn ein cymunedau.”

Mae ei rieni wedi rhannu mor “eithriadol o falch” maen nhw o Tyler. Ac yntau’n gwmni i Tyler ar y noson, dywedodd ei dad fod y foment yn “anrhydedd mawr” i Tyler.

O gael ei gynnwys ar y rhestr fer i ennill y wobr, roedd ei fam yn “wên o glust i glust”.

“Roeddwn i’n falch dros ben pan ddywedodd Tyler wrthyf beth oedd wedi’i wneud. Roedd yn ddewr, aeddfed a chyfrifol iawn ohono i ymddwyn fel y gwnaeth.

“Mae hyn yn dangos ymrwymiad Tyler i’r heddlu – doedd e ddim wir yn ystyried hyn fel rhywbeth anghyffredin, dim ond rhywbeth y dylid ei wneud!

Ar ôl adlewyrchu ar y noson, ac amsugno’r foment, dywedodd, “Yr oedd yn wych gweld cymaint yr oedd pobl wedi sylwi ar fy ngwaith a chymaint yr oedd fy ngwaith ac ymdrech gyda’r cadetiaid yn cael ei werthfawrogi.”