Dathlu Wythnos Plismona Bro 2025

Timau Plismona Bro ac Atal yw llygaid a chlustiau ein cymunedau. Gan ffurfio cysylltiadau cryf â thrigolion, busnesau ac ysgolion, maent wrth galon eu cymdogaethau i ddarparu’r gwasanaeth gorau posibl a chadw pobl yn ddiogel.

Mae heddiw’n nodi lansiad Wythnos Plismona Bro 2025, lle bydd ein timau yma yn Nyfed-Powys yn ymuno â heddluoedd eraill ar hyd a lled y wlad i ddathlu. Er mai busnes fel arfer yw’r gwaith y maent yn ei wneud yr wythnos hon, bydd ein timau’n tynnu sylw at y gwaith hanfodol y mae Swyddogion Cymorth Cymunedol yr Heddlu (SCCH) a Swyddogion Heddlu Bro yn ei wneud, o ymgysylltu â chymunedau, mynd i’r afael â blaenoriaethau lleol, cynnal digwyddiadau lleol a mwy.

I nodi lansiad yr wythnos, dywedodd y Prif Gwnstabl Cynorthwyol Dros Dro Andrew Edwards:

"Mae ein Timau Plismona Bro ac Atal yn rhan hanfodol o blismona yma yn Nyfed-Powys. Mae'r gwaith y maen nhw'n ei wneud yn ein galluogi i wreiddio yn ein cymunedau a deall eich anghenion.

"Nod ein timau yw sicrhau bod ein cymunedau'n fwy diogel; gan ganolbwyntio ar fod yn weladwy ac yn hygyrch, mynd i'r afael ag achosion sylfaenol problemau sy'n achosi troseddu ac ymddygiad gwrthgymdeithasol, a meithrin ymddiriedaeth a hyder mewn plismona.

"Rydym yn sylweddoli y gallai fod materion penodol yn effeithio arnoch chi yn eich cymuned; os oes unrhyw bryderon yr hoffech eu rhannu gyda ni, yna rwy'n eich annog i siarad â'ch swyddog NPPT lleol.

"Drwy gydweithio'n agos â chi yn eich cymunedau, gallwn sicrhau y gallwn ganolbwyntio ar faterion sy'n effeithio arnoch chi mewn gwirionedd."

Rhannodd Comisiynydd yr Heddlu a Throseddu, Dafydd Llewellyn, ei ganmoliaeth hefyd i’n Timau Plismona Bro ac Atal:

“Mae Timau Plismona Bro a Atal yn chwarae rhan hanfodol wrth gadw ein cymunedau’n ddiogel ac yn gysylltiedig. Mae eu gwybodaeth leol, eu gwelededd a’u hymgysylltiad dyddiol â’r cyhoedd yn allweddol i feithrin ymddiriedaeth a mynd i’r afael â’r materion sydd bwysicaf i bobl. Rwy’n falch o’r ymroddiad a ddangosir gan swyddogion a SCCH ledled ardal Dyfed-Powys.”

Bydd diweddariadau ar weithgareddau ein timau yn cael eu rhannu ar cyfrifon cyfryngau cymdeithasol ein tîm drwy gydol ein hwythnos o weithgareddau. Dilynwch ni i weld beth mae eich timau lleol yn ei wneud.