Cyhuddo tri ar ôl canfod canabis gwerth dros hanner miliwn o bunnoedd mewn hen ganolfan deiars

Mae tri unigolyn wedi’u cyhuddo a’u cadw yn y ddalfa ar ôl i’r heddlu ganfod planhigion canabis gwerth hyd at £595,000 yn tyfu mewn hen ganolfan deiars.

Cynhaliodd Heddlu Dyfed-Powys warant yn Nhre Ioan, Caerfyrddin, ddydd Mercher 26 Mawrth, lle y gwnaethant ddarganfod 566 o blanhigion canabis.

Arestiodd swyddogion o dîm plismona rhagweithiol Sir Gaerfyrddin dri dyn.

Mae Atnant Kuka, Edison Kuka a Orgest Bobo wedi’u cyhuddo o gynhyrchu canabis ac maen nhw wedi’u cadw yn y ddalfa.

Cynhaliwyd y warant fel rhan o Ymgyrch Scotney, sef ymateb Heddlu Dyfed-Powys i ffatrïoedd canabis ar raddfa ddiwydiannol yn cael eu sefydlu ledled yr ardal heddlu gan gangiau troseddu trefnedig. 

Cewch ragor o wybodaeth am yr ymgyrch fan hyn: Ymgyrch Scotney | Heddlu Dyfed-Powys