Carcharu dyn am dyfu canabis gwerth hyd at £287,000 mewn tŷ yn y Drenewydd

Mae dyn wedi ei garcharu am dros ddwy flynedd am dyfu 274 planhigyn canabis mewn eiddo yn y Drenewydd.

Arestiwyd Ismet Lika ar ddydd Mercher, 19 Chwefror fel rhan o ymgyrch Heddlu Dyfed Powys i fynd i’r afael â ffatrïoedd canabis sy’n cael eu rhedeg gan gangiau troseddu trefnedig.

Gorfododd tîm o swyddogion yn cynnwys y tîm plismona rhagweithiol, CID, arfau saethu, hyfforddwyr cŵn a swyddogion plismona bro ac atal trosedd, eu ffordd i mewn i eiddo ar Deras Clifton, lle roedd cudd-wybodaeth wedi awgrymu bod canabis yn cael ei dyfu.

Y tu mewn i’r adeilad fe wnaethant ddarganfod planhigion canabis aeddfed ar draws pedwar llawr, gwerth hyd at £287,000. Roedd yr islawr, y lloriau uwch a’r groglofft wedi eu llenwi ag offer tyfu, goleuadau hydroponeg a phibau awyru a oedd yn bwydo gwres allan o’r adeilad drwy’r simnai.

Roedd y gosodiad helaeth hwn yn cael ei redeg gan gyflenwad trydan wedi ei addasu’n anghyfreithlon, gyda’r pafin y tu allan i’r tŷ wedi ei gloddio er mwyn cael mynediad at y prif gyflenwad.

Arestiwyd Ismet Lika, 35 oed, ar y safle a’i gyhuddo â chynhyrchu canabis, a chyfaddefodd i hyn yn y llys. Dedfrydwyd ef i 25 mis yn y carchar oherwydd y drosedd.

Dywedodd Ditectif Gwnstabl James Page: “Gweithredwyd y warant fel rhan o Ymgyrch Scotney, sef gwaith parhaus Heddlu Dyfed Powys i fynd i’r afael â ffatrïoedd canabis ar raddfa ddiwydiannol.

“Mae’r ffermydd canabis hyn yn cael eu gweithredu gan gangiau troseddu trefnedig sy’n ceisio sleifio i mewn i ardal ein heddlu. Byddwn yn parhau ein gwaith i amharu ar eu gwaith, a thynnu unrhyw un sy’n rhan o’r gweithgarwch troseddol hwn allan o’n cymunedau.”

Gallwch ddysgu mwy am Ymgyrch Scotney, gan gynnwys sut i adnabod arwyddion ffatri ganabis, yma: Ymgyrch Scotney | Heddlu Dyfed-Powys