Dathliad Cenedlaethol Staff yr Heddlu: Cwrdd â Rhiannon Evans

Fel rhan o Wythnos Genedlaethol Dathlu a Chydnabod Staff Heddlu, siaradwn gyda Rhiannon Evans, sy’n gweithio fel Ymchwilydd Ariannol Achrededig yn ein Tîm Troseddau Economaidd. Mae hi wedi gweithio i Heddlu Dyfed-Powys ers pum mlynedd.

Mae gan y Tîm Troseddau Economaidd dîm o 21 ymchwilydd a dadansoddwr ariannol, twyll a seiberdroseddu, sy’n gymysgedd o staff heddlu a swyddogion heddlu. Mae’r tîm yn gyfrifol am gyflenwi ymateb yr Heddlu i dwyll a seiberdroseddu drwy gynnal ymchwiliadau troseddol, yn ogystal â rhoi cyngor arbenigol, arweiniad a chymorth i ddioddefwyr, a hwyluso rhaglen ddiogelu uwch ar gyfer dioddefwyr sy’n agored i niwed.

“Mae’r rôl mor agos â gewch chi i Robin Hood cyfoes - cymryd budrelw i ffwrdd wrth y troseddwyr sy’n niweidio ein cymunedau, ac yna ail-fuddsoddi’r arian hwnnw mewn prosiectau cymunedol a mentrau atal trosedd.”

Rydw i wedi gweithio mewn rôl ymchwiliol erioed. Yn y gorffennol, rwyf wedi gweithio fel Swyddog Safonau Masnachu ac fel Ymchwilydd Twyll gyda’r GIG. Daw nifer o’m cydweithwyr o gefndir bancio, felly mae gennym gymysgedd da o brofiad yn ein tîm.

Fel Ymchwilydd Ariannol Achrededig, mae gennyf lwyth achos prysur sy’n fy ngweld i’n ymgymryd ag ymholiadau ariannol i gefnogi ymchwiliadau o unigolion coll perygl uwch i dwyll a llofruddiaeth. Gall cymryd rhan mewn ymchwiliadau mawr fod yn werth chweil – gan helpu i gyfrannu at ymdrech tîm gyda swyddogion a staff ar draws yr Heddlu.

Fel rhan o’m swydd, rwyf hefyd yn cynnal ymchwiliadau atafaelu manwl, sy’n cynnwys cyfrifo elw ariannol troseddwr sydd wedi’i euogfarnu o’i droseddolrwydd a nodi pa asedau sydd ar gael iddo. Mae hyn yn cynnwys ymgysylltu â swyddog yr achos, Gwasanaeth Erlyn y Goron, a’r llysoedd, felly mae sgiliau cyfathrebu da a dawn am drin ffigurau’n hanfodol.

Rwyf wrth fy modd â’m swydd. Mae’n amrywiol, yn heriol, ac fel nifer o rolau gorfodi’r gyfraith, yn esblygu o hyd.

Rydyn ni’n ceisio cyfleoedd i atafaelu arian wrth droseddwyr yn rhagweithiol. Gallech ddweud bod y rôl mor agos â gewch chi i Robin Hood cyfoes - cymryd budrelw i ffwrdd wrth y troseddwyr sy’n niweidio ein cymunedau, ac yna ailfuddsoddi’r arian hwnnw mewn prosiectau cymunedol a mentrau atal trosedd.

“Rwyf wedi cael gorchmynion fforffedu gwerth dros £800,000”

Yn fwy diweddar, rwyf wedi arwain ymchwiliadau adfer sifil, sy’n defnyddio arfau aflonyddu amgen o dan y Ddeddf Elw Troseddau i symud eiddo troseddol o gylchrediad.

Mae hyn wedi bod yn llwyddiannus iawn, ac yn y ddwy flynedd diwethaf, rwyf wedi cael gorchmynion fforffedu gwerth dros £800,000, gyda 50% o hyn wedi’i ail-fuddsoddi yn Heddlu a’r gymuned leol. 

“Er y gall croesholi beri straen, rwyf wir yn mwynhau theatr gweithdrefnau llys a’r bodlonrwydd o gael canlyniad da.”

Rwy’n treulio llawer o amser yn y llys gydag achosion atafaelu ac adfer sifil, sy’n gallu bod yn orchwyl brawychus i gychwyn, ond daw’n haws gydag ymarfer.

Weithiau, cawn gyfle i fynd allan i helpu i chwilio eiddo, sy’n gallu bod yn fuddiol iawn, gan ein bod ni’n edrych gyda phâr gwahanol o lygaid – i nodi asedau a deunydd ariannol. Rwy’n gweld eisiau mynd allan ar warantau o’m dyddiau gyda Safonau Masnachu, felly mae hi bob amser yn braf cael mynd allan o’r swyddfa a bwrw iddi.

Rwyf nawr yn astudio am radd meistr mewn Troseddau Economaidd, sy’n helpu i ddatblygu fy ngwybodaeth am bynciau megis gwyngalchu arian a theori troseddeg.

Ymchwiliadau diddorol:

Mae rhai o’m hymchwiliadau mwyaf diddorol wedi cynnwys:

• Gofalwr a oedd yn rhan o rwydwaith gwyngalchu arian DU-gyfan.
• Twyllwr rhamant, a oedd wedi blacmelio menywod ifainc bregus i roi delweddau cignoeth iddynt.
• Grŵp troseddu trefnedig a oedd yn ymwneud â chyffuriau a oedd ag asedau’n cynnwys ceir, oriorau, cychod a charafanau.

Dywedodd Paul Callard, rheolwr y Tîm Troseddau Economaidd:

“Mae Troseddau Economaidd yn faes plismona gwych i weithio ynddo. Rydyn ni’n wynebu amryw o heriau newydd bob dydd, yn arbennig oherwydd y peryglon a gyflwynir gan y byd rydyn ni’n byw ynddo, sy’n fwyfwy digidol, ac mae’n rhaid inni feddwl yn arloesol er mwyn bodloni’r heriau hynny.”