Datganiad Gwrandawiad Camymddwyn Cyflymedig Cwnstabl yr Heddlu Horton

Ar 10 March 2025, cynhaliwyd Gwrandawiad Camymddwyn Cyflymedig ym Mhencadlys Heddlu Dyfed Powys mewn cysylltiad â Chwnstabl yr Heddlu Gareth Horton, a oedd yn flaenorol yn gweithio yn y Drenewydd, Sir Drefaldwyn. Cadeiriwyd y Gwrandawiad gan y Prif Swyddog Mr Ian Arundale, sydd newydd gael ei benodi’n Gadeirydd Panel Camymddwyn yr Heddlu.

Roedd Cwnstabl yr Heddlu Horton yn rhan o grŵp WhatsApp gyda swyddog o Heddlu Glannau Mersi, lle’n dilyn atafaelu ffôn swyddog arall, canfuwyd negeseuon o natur drawsffobig, homoffobig, hiliol, ac anabliaethol.

Cafwyd bod yr ymddygiad yn torri safonau ymddygiad proffesiynol mewn perthynas ag Awdurdod, Parch a Chwrteisi, Ymddygiad Annheilwng, a Chydraddoldeb ac Amrywiaeth, ac y mae wedi ei ddiswyddo ar unwaith. Bydd y swyddog nawr yn cael ei ychwanegu at Restr Waharddedig y Coleg Plismona a fydd yn ei atal rhag ailymuno â gwasanaeth yr heddlu.

Dwedodd y Dirprwy Brif Gwnstabl Ifan Charles, yr Awdurdod Priodol ar gyfer cwynion a chamymddwyn yn Heddlu Dyfed Powys:

“Mae Heddlu Dyfed Powys yn disgwyl y safonau uchaf o ran ymddygiad proffesiynol gan ei swyddogion a’i staff, boed hwy ar ddyletswydd neu beidio. Mae cadw’n dawel tra bod swyddogion eraill yn gwneud sylwadau y byddai mwyafrif cymdeithas yn eu cael yn resynus yn hollol annerbyniol, ac islaw’r hyn a ddisgwylir gan swyddog heddlu.

“Rwyf yn croesawu’r defnydd o wrandawiad camymddwyn cyflymedig yn yr achos hwn. Fel heddlu, byddwn yn defnyddio pob offeryn sydd ar gael i ni er mwyn sicrhau dull effeithlon a chwim o ddiswyddo swyddogion na ddylai bellach ddal swydd cwnstabl.

“Mae canlyniad gwrandawiad heddiw’n adlewyrchu’r dull hwn, ac rwyf yn gobeithio ei fod yn sicrhau’r cyhoedd y bydd Heddlu Dyfed Powys yn gwneud pob peth y gall i gynnal y safonau uchel a ddisgwylir yn briodol gan swyddogion a staff - boed hynny pan ar ddyletswydd neu beidio, a boed hynny hefyd arlein neu’n bersonol.”