Tri dyn yn cael eu carcharu am herwgipio ac ymosod ar ddyn yn dilyn cynllwyn gofalus a chymhleth

Mae’r tri dyn wedi’u carcharu am wyth mlynedd a mis yr un am ddenu’r dioddefwr yn fwriadol i leoliad anghysbell, gorfodi iddo ddioddef trais sylweddol a’i atal â gefynnau.

Twyllodd Mohammad Comrie, 22 oed, o Leeds; Faiz Shah, 22 oed, o Bradford; ac Elijah Ogunnubi-Sime, 20 oed o Croydon y cynhyrchydd cerddoriaeth o Lundain i deithio i orllewin Cymru ar 26 Awst 2024 lle gwnaethant ei herwgipio ac ymosod arno. Yn ystod yr ymosodiad, dioddefodd anafiadau i’w wyneb a’i ben.

Trefnodd y diffynyddion i’r cynhyrchydd deithio i Sir Gaerfyrddin gan ddweud wrtho ei fod yn mynd i fynychu gwersyll recordio cerddoriaeth yng Nghymru a gweithio gyda cherddorion eraill, a’r cyfan wedi ei drefnu gan yr hyn a gredai ef oedd yn gwmni cynhyrchu a recordio cerddoriaeth dilys.

Pan adawodd y diffynyddion yr ystafell lle’r oeddent wedi ei gadw, llwyddodd y dioddefwr i ddianc trwy godi ei ddwylo mewn gefynnau i fyny polyn a rhyddhau ei hun o’r lleoliad, ac yna rhedodd allan o’r eiddo. Cafodd ei gludo i’r ysbyty o ganlyniad i’r digwyddiad.

Roedd y tri dyn wedi ffoi o’r eiddo ond daethpwyd o hyd iddynt yn ddiweddarach y noson honno ar ôl defnyddio adnoddau heddlu sylweddol, gan gynnwys hofrennydd heddlu, wedi i’r heddlu ymateb i adroddiadau o ymosodiad mewn eiddo yn ardal Brynteg, Llanybydder. Roeddent yn cuddio mewn caeau o amgylch yr eiddo.

Cafodd y tri eu harestio a’u cyhuddo yn hwyrach. Plediodd y tri yn euog i herwgipio ar ddiwrnod cyntaf eu hachos yn Llys y Goron Abertawe ar Chwefror 18.

Dedfrydwyd Mohammad Comrie i wyth mlynedd a mis o garchar, dedfrydwyd Faiz Shah is wyth mlynedd a mis o garchar, ac fe ddedfrydwyd Elijah Ogunnubi-Sime i wyth mlynedd a mis mewn sefydliad troseddwyr ifanc heddiw.

Dywedodd yr Arolygydd Gareth Jones, Dirprwy Uwch Swyddog Ymchwilio yn yr achos: “Mae’n amlwg bod y drosedd hon wedi cael effaith ddofn, dirdynnol a pharhaol ar y dioddefwr a’i deulu. Roedd y drosedd wedi’i chynllunio’n drylwyr ac roedd elfennau’n soffistigedig, gan gynnwys yr hunaniaethau ffug a ddefnyddiwyd.

“Roedd yn amlwg yn gynnar iawn yn eu negeseuon i’w gilydd mai eu bwriad oedd herwgipio’r dioddefwr. Mae’r cymhelliad yn ymddangos yn ddeublyg – yn gyntaf, roedd yn amlwg eu bod yn bwriadu cribddeilio arian gan y dioddefwr ac ar ben hynny efallai roedd cymhelliant gwleidyddol hefyd.

"Hoffwn ddiolch i bawb sydd wedi ymwneud â dod â’r achos yma i’r llys, yn enwedig y tîm ymchwilio am eu dycnwch a phroffesiynoldeb ac am ymdrechion penderfynol a diflino y swyddogion oedd yn y fan a’r lle yn ceisio dod o hyd i’r diffynyddion ar ol chwilio hirfaith ac anodd a sicrhau tystiolaeth hollbwysig. Sicrhau cyfiawnder i’r dioddefwr oedd ein blaenoriaeth o’r cychwyn.

“Hoffwn hefyd ddiolch i’r Community Security Trust (CST) am gefnogi’r dioddefwr yn dilyn y digwyddiad dirdynnol yma, a oedd yn cynnwys rhoi cefnogaeth seicolegol ac emosiynol hanfodol.

“Mae’r ddedfryd hon heddiw yn adlewyrchu difrifoldeb y drosedd hon – a’n gobaith yw y bydd y dioddefwr yn teimlo ei fod yn cael cyfiawnder. Diolchwn iddo am ei rym a’i amynedd wrth i ni gynnal ymchwiliad trylwyr i’r hyn oedd yn drosedd anarferol.”