Carcharu dyn o Rydaman am deuddeg mlynedd am droseddau rhyw hanesyddol yn erbyn plant yn Sir Gaerfyrddin
Cynnwys y prif erthygl
Bydd dyn o Rydaman a dreisiodd dau blentyn a’u cam-drin yn rhywiol, yn treulio’r deuddeg mlynedd nesaf dan glo, diolch i ddewrder ei ddioddefwyr.
Dedfrydwyd Lloyd Davies, 29 oed, o Gaecoed, Llandybïe, i deuddeg mlynedd o garchar yn Llys y Goron Abertawe heddiw (Dydd Gwener, 9 Mai, 2025).
Roedd ei ddioddefwyr, sef dwy ferch, rhwng 6 ac 11 oed pan gyflawnwyd y troseddau.
Bu un o ddioddefwyr Davies yn ddigon dewr i ddod ymlaen ar ôl ymddiried mewn ffrind a chwnsler yn ei choleg wedi hynny, cyn adrodd am y troseddau wrth yr heddlu ym mis Rhagfyr 2022.
Clywodd y llys bod Davies wedi’i threisio am y tro cyntaf wrth iddynt chwarae’r gêm gyfrifiadurol Minecraft pan oedd hi dal yn yr ysgol gynradd. Profodd arwyddocâd y gêm gyfrifiadurol a’r cyfrifon a roddwyd gan y dioddefydd a’r drwgdybyn yn amhrisiadwy yn y gweithdrefnau llys, gan ddarparu cryfder a hygrededd ychwanegol i honiadau’r dioddefwyr yn y llys, a arweiniodd at ddyfarniad euog unfrydol.
Dioddefodd y dioddefydd bedwar achos arall o gam-drin rhywiol a thrais gan Davies. Cyfaddefodd ei fod wedi effeithio ar ei phlentyndod a bod ei gorbryder yn deillio o flynyddoedd o gam-drin a chelu’r gwir.
Yn dilyn arést Davies, daeth ail ddioddefydd ymlaen at yr heddlu. Dywedodd ei bod hi wedi’i cham-drin yn rhywiol ganddo pan oedd hi tua naw oed.
Cynhaliwyd ymchwiliad gan Heddlu Dyfed-Powys a arweiniodd at Lloyd Davies yn cael ei ganfod yn euog o dri achos o dreisio plentyn o dan 13 oed, dau achos o achosi neu annog plentyn o dan 13 oed i gymryd rhan mewn gweithgarwch rhywiol, ymosodiad rhywiol ar blentyn o dan 13 oed, a gwneud delwedd anweddus categori A o blentyn, pan ymddangosodd gerbron Llys y Goron Abertawe ar 26 Mawrth 2025.
Gan siarad ar ôl i Davies gael ei ddedfrydu, dywedodd y Ditectif Ringyll Carl Pocock o Heddlu Dyfed-Powys:
“Mae’r achos hwn yn ein hatgoffa y gellir dal sicrhau cyfiawnder flynyddoedd ar ôl unrhyw gam-drin. Gallaf sicrhau unrhyw ddioddefydd sy’n ceisio penderfynu a ddylai ddod ymlaen ai peidio na fydd unrhyw oedi o ran adrodd yn golygu na fyddwn ni’n gwrando arno neu’n ei gredu.
“Bydd ein swyddogion arbenigol yn gwrando arnoch ac yn eich cefnogi drwy’r broses, ni waeth pa mor hir yn ôl ddigwyddodd y drosedd. Rwy’n gobeithio bod y canlyniad hwn yn dangos nad yw byth yn rhy hwyr i godi eich llais.
“Arweiniodd ymchwiliad heddlu cynhwysfawr gan y Ditectif Gwnstabl Katie Rees at nifer o gyhuddiadau’n cael eu hawdurdodi gan Wasanaeth Erlyn y Goron. Darparodd y Ditectif Gwnstabl Rees gymorth arbenigol i’r dioddefwyr a’u teuluoedd drwy gydol yr ymchwiliad, gan roi’r hyder iddynt fynd ymlaen a rhoi tystiolaeth yn y llys.
“Yn bwysicaf oll, hoffwn ddiolch o waelod calon i’r dioddefwyr yn yr achos hwn, sydd wedi bod yn ddewr iawn yn dod ymlaen i’r heddlu ac adrodd am y trawma y gwnaethant ddioddef fel plant ifainc.
“Maen nhw wedi dangos dewrder, cymeriad a chadernid aruthrol, a dylent fod yn falch o’r ffordd maen nhw wedi cynnal eu hunain drwy gydol yr ymchwiliad.
“Diolch i’w dewrder nhw, bydd Lloyd Davies nawr yn treulio cyfnod hir yn y carchar, gan wneud ein cymunedau’n fwy diogel. Rwy’n gobeithio bydd dedfryd heddiw’n dod â rhywfaint o ddiweddglo i’r dioddefwyr ac y gallant geisio symud ymlaen â’u bywydau yn awr.”
Mae dioddefwyr yr achos hwn eisiau diolch i’r heddlu am y cymorth arbennig y gwnaethant dderbyn drwy gydol y broses, a byddent yn annog eraill i ddod ymlaen, gan sicrhau dioddefwyr y bydd yr heddlu’n gwrando arnynt os ydynt yn dod o hyd i’r cryfder i ddod ymlaen a siarad.
Os oes angen cymorth arnoch ar gyfer trais neu drosedd rhywiol, cewch gymorth a chefnogaeth fan hyn: Cefnogaeth ar ôl trais rhywiol ac ymosodiad rhywiol | Heddlu Dyfed-Powys
Er mwyn adrodd am drais neu drosedd rhywiol, galwch heibio i’n gwefan fan hyn: Riportio treisio, ymosod rhywiol a throseddau rhywiol eraill | Heddlu Dyfed-Powys
If you need support for rape or sexual offence, you can find help and support here: Support after rape and sexual assault | Dyfed-Powys Police
To report a rape or sexual offence, visit our website here: Report rape, sexual assault and other sexual offences | Dyfed-Powys Police