Dyn yn pledio’n euog ar ôl i swyddogion ddod o hyd i 350 o blanhigion canabis yn Llanelli.

GWARANT | Dyn yn pledio’n euog o flaen y llys ddiwrnod yn unig ar ôl i swyddogion ddod o hyd i 350 o blanhigion canabis mewn eiddo masnach segur yn Llanelli.

Arestiwyd Pllumb Krosi, 34 oed, ddydd Mercher 30 Ebrill ar ôl i swyddogion o Dîm Plismona Achosion Difrifol Sir Gaerfyrddin ddefnyddio grym i gael mynediad i eiddo ar Stryd Vaughan, Llanelli, i weithredu gwarant gyffuriau a oedd wedi’i threfnu ymlaen llaw.

Wrth fynd mewn drwy gefn yr adeilad, gwelodd swyddogion fferm ganabis fawr a oedd yn ymestyn dros dri llawr, gydag addasiadau soffistigedig i reoli trydan, awyriad, golau a thymheredd yr adeilad.

Daeth swyddogion o hyd i Krosi yn yr hyn a ddisgrifiwyd fel annedd y fferm ganabis cyn iddo gael ei arestio’n gyflym a’i gymryd i’r ddalfa. Cafodd ei gyhuddo a’i anfon yn ôl i’r ddalfa’n hwyrach y diwrnod hwnnw.  

Atafaelwyd gwerth tua £326,000 o blanhigion canabis yn ystod y chwiliad, yn ogystal ag allweddi i glo clap wedi’i osod ar far metel a oedd wedi’i sefydlu i atal unrhyw un rhag defnyddio grym i gael mynediad i’r adeilad.

Gan ymddangos yn Llys Ynadon Llanelli'r diwrnod canlynol (1 Mai), plediodd Pllumb Krosi yn euog i drin canabis a chafodd ei anfon yn ôl i’r ddalfa hyd nes y bydd yn cael ei ddedfrydu yn Llys y Goron Abertawe ddydd Iau 29 Mai 2025.

💬 Dywedodd y Ditectif Ringyll Richard Saunders

“Dyma un o nifer o warantau sydd wedi’u cynnal fel rhan o Ymgyrch Scotney, wrth inni geisio aflonyddu ar gangiau troseddu trefnedig yn cynhyrchu canabis yn ein hardal heddlu.

“Rwyf eisiau annog y cyhoedd i barhau’n effro i arwyddion bod canabis yn cael ei dyfu yn eu hardal leol a pharau i adrodd am unrhyw bryderon wrth yr heddlu. Mae’r achos hwn yn dangos ein hymrwymiad tuag at sicrhau bod ein hardal heddlu’n parhau’n elyniaethus i’r rhai sy’n gwerthu cyffuriau.”

Arwyddion mwyaf cyffredin ffatri ganabis yw:

• GWRES: Mae angen gwres ar blanhigion canabis i dyfu. Efallai byddwch chi’n gweld anwedd ar ffenestri neu’n sylwi nad oes ia ac eira ar doeon adeg y gaeaf.
• AROGL: Mae gan blanhigion canabis arogl cryf, sy’n gryfach yn ystod tri mis olaf y cyfnod tyfu.
• SBWRIEL: Llawer o sbwriel ‘gardd’ wedi’i adael tu allan, megis potiau planhigion, compost a chynwysyddion bwyd planhigion gwag.
• GOLAU: Mae angen goleuadau llachar ar ganabis 24 awr y dydd i dyfu. Efallai y byddwch chi hefyd yn clywed sŵn ffannau.
• CYFRINACHEDD: Efallai bydd ffenestri wedi’u gorchuddio er mwyn cuddio gweithgarwch anghyfreithlon, neu efallai bydd cloeon ychwanegol wedi’u gosod.
• TRYDAN: Efallai bydd eich stryd yn dioddef toriadau trydan mwy cyson ac anarferol wrth i fesuryddion trydan gael eu hosgoi. 
• YMWELWYR: A oes pobl yn mynd a dod, o bosibl yn ystod oriau anarferol? A yw’r goleuadau ymlaen o hyd ond nid yw’n ymddangos fel pe bai rhywun yno?

Os oes gennych unrhyw wybodaeth neu bryderon i’w rhannu, cysylltwch â Heddlu Dyfed-Powys drwy un o’r dulliau canlynol:

Ar-lein | https://bit.ly/DPPContactOnline,

E-bost | [email protected],

Ffôn | 101

Fel arall, cysylltwch â’r elusen annibynnol Crimestoppers yn ddienw drwy alw 0800 555111, neu drwy alw heibio i crimestoppers-uk.org.

Darllenwch fwy am Ymgyrch Scotney yma: Ymgyrch Scotney | Heddlu Dyfed-Powys