Prif swyddogion yn addo ymateb cefnogol a grymusol i drais yn erbyn menywod, cam-drin domestig a thrais rhywiol a gyflawnir gan yr heddlu

Mae prif swyddogion heddlu wedi ymrwymo i greu diwylliant heddlu lle nad yw trais yn erbyn menywod a merched, cam-drin domestig a thrais rhywiol a gyflawnir gan yr heddlu byth yn cael ei oddef, ei leihau na’i esgusodi.

Mae’r Llw Trais yn Erbyn Menywod, Cam-drin Domestig a Thrais Rhywiol a Gyflawnir gan yr Heddlu wedi’i lofnodi gan y Prif Gwnstabl Ifan Charles, y Dirprwy Brif Gwnstabl Dros Dro Gary Phillips, y Prif Gwnstabl Cynorthwyol Dros Dro Andrew Edwards, Cyfarwyddwr Datblygu Pobl a’r Sefydliad Linda Williams, y Cyfarwyddwr Cyllid Ed Harries, a Phennaeth yr Adran Safonau Proffesiynol y Ditectif Uwch-arolygydd Phil Rowe fel addewid i roi ymateb unigol, cefnogol a grymusol i unrhyw ddioddefwr-goroeswr sy’n profi troseddau trais yn erbyn menywod, cam-drin domestig a thrais rhywiol a gyflawnir gan yr heddlu.

Mae’r llw wedi’i lansio ar Ddiwrnod Rhuban Gwyn, sef diwrnod lle mae unigolion a sefydliadau ar draws y byd yn ymrwymo i beidio byth â chyflawni trais yn erbyn menywod a merched, ei oddef nac aros yn dawel amdano.

Drwy roi eu henwau i’r Llw Rhuban Gwyn a’r Llw Trais yn Erbyn Menywod, Cam-drin Domestig a Thrais Rhywiol a Gyflawnir gan yr Heddlu, mae prif swyddogion wedi cadarnhau eu cyfrifoldeb fel cynghreiriaid i fenywod a merched mae’r heddlu’n eu gwasanaethu ac yn gweithio gyda nhw.

Dywedodd y Prif Gwnstabl Ifan Charles: “Mae’n hollbwysig bod gan ein cymunedau hyder a ffydd ynom fel heddlu, pe bai byth angen iddynt adrodd am weithred o drais neu gam-drin domestig neu rywiol a gyflawnir gan yr heddlu.

“Gwyddom fod dioddefwyr-goroeswyr yn wynebu rhwystrau ychwanegol sylweddol i adrodd am droseddau a gyflawnir gan yr heddlu, ac rwyf i – ynghyd â’r prif swyddogion eraill – wedi ymrwymo i sicrhau nad yw hyn yn wir yma yn Nyfed-Powys.

“Rydyn ni’n addo dileu unrhyw rwystrau, a chynnig ymateb wedi’i deilwra i’ch gwarchod a’ch cefnogi. Arwyddo’r llw hwn, ynghyd â’r llw Rhuban Gwyn, yw ein ffordd ni o arddangos yr ymrwymiad hwn i’r cymunedau rydyn ni’n eu gwasanaethu.”

O dan y llw, gwneir yr addewidion canlynol i ddioddefwyr troseddau trais yn erbyn menywod, cam-drin domestig a thrais rhywiol a gyflawnir gan yr heddlu:

• Byddwn yn gwrando arnoch, yn eich trin o ddifri ac yn eich clywed
• Byddwch chi’n cael eich trin â pharch
• Gweithredir polisi ‘angen gwybod’ llym, a chedwir eich manylion yn gyfrinachol
• Eich diogelwch chi, diogelwch eich plant a diogelwch eich teulu fydd ein blaenoriaeth bob amser
• Mae eich barn yn bwysig, a byddwn yn gwrando arno. Byddwch chi’n cael eich diweddaru a’ch hysbysu am bob penderfyniad
• Bydd yr ymchwiliad yn cael ei drin yn ddiduedd. Byddwn yn ymgysylltu â Chomisiwn Cwynion Annibynnol yr Heddlu.
• Mae eich lles yn bwysig i ni, a byddwn ni’n eich helpu i gael mynediad i’r cymorth sy’n iawn i chi
• Byddwn ni’n defnyddio gweithdrefnau disgyblu troseddol a mewnol er mwyn mynd i’r afael ag ymddygiad yr adroddwyd amdano.