Apêl o’r newydd i adnabod dyn y daethpwyd o hyd iddo yng nghronfa ddŵr Claerwen

Mae’r heddlu wedi cyhoeddi apêl o’r newydd am wybodaeth flwyddyn ar ôl i gorff gael ei ganfod mewn cronfa ddŵr ym Mhowys.

Ar ôl 12 mis o ymholiadau, nid yw Heddlu Dyfed-Powys wedi llwyddo i adnabod y dyn y daethpwyd o hyd iddo’n farw yng nghronfa ddŵr Claerwen yng Nghwm Elan eto.

Wrth i ben-blwydd y darganfyddiad agosáu, mae’r heddlu’n gofyn i’r cyhoedd gyflwyno unrhyw wybodaeth a allai helpu.

Dywedodd y Ditectif Arolygydd Anthea Ponting, sydd wedi arwain yr ymchwiliad: “Mae’r ffaith ein bod ni heb lwyddo i adnabod rhywun blwyddyn ar ôl ei ganfod yn farw yn sefyllfa anarferol iawn.

“Rydyn ni wedi dilyn sawl llwybr ymholi, ond nid ydym ronyn yn nes at ddarganfod pwy yw’r dyn hwn, o ble y daeth, a sut y collodd ei fywyd.

“Mae’n fab i rywun, yn bartner i rywun o bosibl, yn frawd neu’n dad, a hoffem ei ddychwelyd i unrhyw deulu neu anwyliaid a allai fod yn gweld ei eisiau.

“Gallai unrhyw wybodaeth sydd gennych fod yn allweddol i ddarganfod pwy ydyw.”

Derbyniodd ystafell reoli Heddlu Dyfed-Powys alwad 999 ychydig cyn 8.30 o’r gloch y bore ar 18 Hydref 2024 yn adrodd bod corff dyn wedi’i weld yn y dŵr gan gerddwr.

Rhuthrodd y gwasanaethau brys i’r lleoliad, sef rhan anghysbell o’r gronfa ddŵr, a chasglu’r corff.

Drwy archwiliad post-mortem, canfu mai corff dyn chwe throedfedd rhwng 30 a 60 oed ydoedd. Amcangyfrifir bod y corff wedi bod yn y dŵr am hyd at 12 wythnos.

Ni ddaethpwyd o hyd i unrhyw eitemau personol o gwmpas y gronfa ddŵr ac nid oedd y dyn yn gwisgo oriawr na gemwaith, felly’r unig eitem oedd ar gael i swyddogion gynnal ymholiadau oedd siwt wlyb.

Dywedodd y Ditectif Arolygydd Ponting: “Roedd y dyn yn gwisgo siwt wlyb Zone 3 Agile maint mawr iawn, sy’n golygu bod y gwisgwr o bosibl yn 6’ i 6’ 5”, tua 202 bwys i 220 pwys, gyda brest 44 modfedd i 48 modfedd.

“Heblaw hynny, nid oes gennym unrhyw wybodaeth neu fanylion eraill am eiddo personol a allai’n helpu i’w adnabod.

“Doedd dim cerbydau, beiciau na dulliau trafnidiaeth eraill yn yr ardal a allai fod wedi dangos sut y cyrhaeddodd yno, neu y gallem fod wedi defnyddio i sefydlu llwybr teithio.”

Dros y 12 mis diwethaf, mae swyddogion wedi gwirio ei ddisgrifiad yn erbyn rhestri o unigolion coll o Ddyfed-Powys a phob ardal heddlu arall yn y DU, ymgysylltu â heddluoedd rhyngwladol, a chynnal ymholiadau gyda chronfeydd data DNA ac olion bysedd.

Ond bu pob llwybr ymholi’n aflwyddiannus.

“Mae’n rhaid bod rhywun yn gweld eisiau’r unigolyn hwn,” meddai’r Ditectif Arolygydd Ponting. “Cysylltwch â ni os ydych chi’n credu’ch bod chi’n medru’n helpu i’w adnabod.”

Os wnaethoch chi ymweld â Chronfa Ddŵr Claerwen rhwng Gorffennaf a 18 Hydref 2024, a gweld rhywbeth a allai helpu ymholiadau, neu rydych chi’n gwybod am rywun sydd heb ei weld ers cryn amser ac sy’n cyfateb â’r disgrifiad uchod, cysylltwch â Heddlu Dyfed-Powys drwy un o’r ffyrdd canlynol:

Ar-lein: https://www.dyfed-powys.police.uk/cy-GB/cysylltu-a-ni/af/cysylltu-a-ni-beta/cysylltu-a-ni/

E-bost: [email protected]

Ffôn: 101