Carcharu menyw am ei rhan mewn ymgais i gyflawni lladrad â chyllell mewn siop yn Aberdaugleddau

Mae menyw 31 oed wedi ei charcharu am ymgais i gyflawni lladrad wedi iddi fynd mewn i Siop Gornel Pill gyda chyllell a mynnu arian gan weithwraig y siop.

Ymddangosodd Jessie Thompson yn Llys y Goron Abertawe wedi ei chyhuddo o ymgais i gyflawni lladrad a meddiant o erfyn llafnog yn dilyn y digwyddiad ar Orffennaf 11.

Clywodd y llys bod Thompson a’i chyd-droseddwr Bethan John, 25 oed, wedi cerdded i mewn i’r siop gyda mygydau dros eu hwynebau, yn chwifio cyllell cegin. Bygythiodd un o’r pâr y weithwraig gyda’r gyllell, a dweud ‘rho dy arian i gyd i fi’.

Amddiffynnodd gweithwraig y siop ei hun gyda chrât llaeth, a dihangodd Thompson a John o’r siop. Ni chafodd unrhyw arian nag eitemau eu dwyn.

Yn ddiweddarach galwodd aelod o’r cyhoedd Heddlu Dyfed Powys i ddweud bod bag o ddillad wedi cael ei daflu i’w ardd. Sefydlodd ymholiadau bod y rhain yn cyfateb i’r dillad yr oedd Thompson a John yn eu gwisgo, wedi iddynt gael eu hadnabod drwy recordiad teledu cylch cyfyng.

Wrth iddynt gael eu harestio, dwedodd Thompson a John eu bod yn mynd i’w hildio eu hunain, a dwedasant wrth swyddogion eu bod wedi taflu’r gyllell i glawdd ger Ystâd Mount.

Wedi iddi gyfaddef i’r troseddau, dedfrydwyd Thompson i dair blynedd a phedwar mis yn y carchar.

Plediodd John yn euog hefyd a bydd yn cael ei dedfrydu ar ddyddiad diweddarach.

Dywedodd y Ditectif Gwnstabl Dean Chilcott: “Rydym yn falch bod difrifoldeb y digwyddiad hwn wedi ei gydnabod gan y llys, a bod Thompson wedi ei dedfrydu’n briodol am y rhan a chwaraeodd.

“Mae’r siop hwn wedi cael ei dargedu’n gyson gan droseddwyr, tra bod y perchnogion a’r gweithwyr yn ceisio gwneud eu gwaith wrth ddarparu gwasanaeth ar gyfer y gymuned leol. Ni ddylent byth orfod ofni am eu diogelwch pan yn y gwaith, na bod mewn sefyllfa o orfod amddiffyn eu hunain rhag trais.

“Rwy’n gobeithio y bydd y ddedfryd hon yn anfon neges ein bod ni, ac y byddwn yn parhau i  weithredu’n gadarn yn erbyn y rhai hynny sy’n gyfrifol am ddigwyddiadau ofnadwy fel hyn.”